Zakon.kz хабарлайды: «Алматыда атмосфералық ауаны қорғау қағидаларының жобасы әзірленді. Құжатқа сәйкес, қалаға кейбір көлік иелерінің кіруі ақылы болуы мүмкін. Жоба шеңберінде төмен эмиссиялы аймақтар (Low Emission Zones, LEZ) құру қарастырылған. Бұл аймақтарда экологиялық класы төмен автокөліктерді пайдалану шектеліп, ақылы негіздежүзеге асырылады. Сонымен қатар, коммуналдық және жекеменшік автопарктерге, сондай-ақ стационарлық шығарындыға қойылатын талаптар күшейтілмек. Алматы қаласы әкімдігінің баспасөз қызметі хабарлағандай, жоба аясында заманауи технологияларды пайдалана отырып, экологиялық мониторинг жүйесін кеңейту қарастырылған. Бұл үшін арнайы датчиктер мен дрондар қолданылады. Сондай-ақ жанармай сапасына бақылау күшейтіледі. Алғашқы кезеңде, шамамен қазан айында, жоба тестілеу және «базалық жыл» автопаркі мен көлік ағындарын талдау мақсатында жүргізіліп, көлік иелерінен ақы алынбайды. Алдағы уақытта Еуро-0-4 экологиялық санатындағы автокөліктердің Алматыға кіруі ақылы болады. Ал электромобильдер, сутек отынымен жүретін көліктер және Еуро-5 пен Еуро-6 санатына жататын автокөліктер төлемнен босатылады. Белгіленген аумақта тұратын тұрғындар үшін жеңілдік қарастырылған: егер олар «Таза қала» ақпараттық жүйесіне тіркеліп, техникалық тексерістен сәтті өтсе, ай сайынғы абонементті төмендетілген бағамен рәсімдей алады.
Евразия24 пікірі:
Қазақстанның ең ірі қаласында экологиялық жағдай ушығып тұр. Бұл мәселе енді жай ғана алаңдаушылық емес, жедел әрекетті қажет етеді. Қаланың негізгі экологиялық мәселесі – көлік. Сол себепті қала әкімдігі ең алдымен осы бағытқа назар аударуда. 2022 жылы ресми деректерге сәйкес, тәулігіне қала ішінде 470 мың, ал сырттан кіретін 230 мың автокөлік қозғалысы тіркелген. Қала мен оның маңындағы елді мекендердің дамуын ескерсек, бүгінде бұл көрсеткіш едәуір артқан. Алматыға көліктердің ақылы кіруі жөніндегі бастама жаңалық емес. Бұл мәселе экологиялық қауымдастықта 2023 жылы көтерілген еді. Бірақ сол уақытта ұсыныс қоғамда теңсіздік туғызады деген пікір басым болып, бастама екі жыл бойы күн тәртібінен түсіп қалған. Араға екі жыл салып, бұл мәселе қалалық әкімдік деңгейінде қайта қаралып отыр. Әсіресе ақылы аймақта тұратын тұрғындарға қатысты қабылданған шешім ерекше сұрақ тудырып отыр. Ай сайынғы абонементтің арзандатылған құны қала тұрғындары үшін әлеуметтік теңсіздікті жоя алмайды, керісінше, кейбір азаматтарды өзгелерден бөлектейді. Құқықтық тұрғыдан бұл – дискриминация. Сарапшылардың айтуынша, Алматыда «ауаға салынатын салықтың» өзіндік түрі қалыптасуы мүмкін. Алайда бұл бастама экологиялық ахуалды шиеленістіріп отырған негізгі себептерге, оның ішінде жел арналарының бұзылуына және шамадан тыс құрылыс салуға ықпал етпейді.
