Астана. 2 қыркүйек. ИНТЕРФАКС-ҚАЗАҚСТАН – «Самұрық-Қазына» АҚ мен Huawei Technologies Co. LTD телекоммуникациялық технологияларды енгізу және серверлік инфрақұрылымды жаңғырту жөніндегі стратегиялық келісімге қол қойды. Бұл туралы Мемлекет басшысының баспасөз қызметі хабарлады.
Хабарламада атап өтілгендей, Қазақстан Президенті Қасым-Жомарт Тоқаев Huawei Technologies Co. LTD директорлар кеңесінің төрағасы Хуа Лянды қабылдап, озық технологиялар мен цифрлық шешімдер саласындағы өзара тиімді ынтымақтастық перспективаларын талқылады.
«Мемлекет басшысы «Самұрық-Қазына» АҚ мен Huawei компаниясы арасында инновациялық телекоммуникациялық технологияларды енгізу және серверлік инфрақұрылымды жаңғырту жөніндегі стратегиялық келісімге қол қойылғанын құптады. Келісім аясында цифрлық трансформация мен орнықты даму бағыттарында бірлескен жобаларды жүзеге асыру жоспарлануда», – делінген хабарламада.
Сондай-ақ, тараптар Қазақстандағы IT, жасанды интеллект және үлкен деректерді талдау салаларында отандық білікті мамандарды даярлау жөніндегі Huawei-дің білім беру бастамаларына ерекше назар аударды.
Huawei – әлемдегі жетекші ақпараттық-коммуникациялық технологиялар мен смарт құрылғыларды жеткізушілердің бірі. Компания 170-тен астам ел мен өңірде қызмет атқарады, 3 миллиардтан астам пайдаланушыға қызмет көрсетеді.
Ал «Самұрық-Қазына» ұлттық әл-ауқат қоры Air Astana, «Қазтелеком», «Қазатомөнеркәсіп», «ҚазМұнайГаз», «Қазпошта», «Қазақстан темір жолы», KEGOC секілді Қазақстанның стратегиялық маңызды компанияларын басқарады.
