Гонконг, 8 қыркүйек. ИНТЕРФАКС – Индонезияда екі аптаға созылған жаппай халық наразылығынан кейін Қаржы министрі Шри Муляни Индравати қызметінен кетті. Бұл туралы елдің Мемлекеттік хатшылық министрі Прасетхо Хади хабарлады. Алайда оның орнына кімнің тағайындалатыны әзірге белгісіз.
Батыс ақпарат құралдарының мәліметінше, Индравати — ел тарихындағы ең ұзақ қызмет еткен қаржы министрлерінің бірі. Ол бұл лауазымды 2005–2010 және 2016–2025 жылдары атқарған. Министр ретінде ол салық жүйесін реформалап, COVID-19 пандемиясы кезінде және басқа да дағдарыс жағдайларында экономиканы тұрақтандыруға үлес қосқан.
Наразылықтар тамыздың соңында Джакартада басталды. Бұған парламент депутаттарына ай сайын тұрғын үйге жұмсалатын шығындар үшін қосымша өтемақы беру туралы ақпарат себеп болған. Қоғам тарапынан сынға ұшыраған бұл бастама елде азық-түлік бағасы, салық пен жұмыссыздық деңгейі өсіп тұрған тұста айтылды.
Наразылықтар елдің өзге өңірлеріне де тарады. Джакартада курьер жүргізушісінің полицей көлігінің соқтығысуынан қаза табуы жағдайды ушықтырды. Содан кейін Медан (Солтүстік Суматра), Суракарта мен Магеланг (Орталық Ява), Маланг (Шығыс Ява), Бенкулу (Суматра аралындағы Бенкулу провинциясы), Пеканбару (Риау провинциясы) және Маноквари (Батыс Папуа) қалаларында да шерулер мен полициямен қақтығыстар тіркелді.
Наразылық барысында бірқатар шерушілер тіпті Шри Муляни Индраватидің үйіне баса-көктеп кіріп үлгерген.
