Токио, 22 қыркүйек. Жапонияда билеуші Либерал-демократиялық партия (ЛДП) төрағалығына үгіт-насихат кезеңі басталды, деп хабарлайды Киодо.
4 қазанда өтетін сайлауға бес үміткер қатысады: Министрлер кабинеті бас хатшысы Есимаса Хаяси, ауыл шаруашылығы, орман және балық шаруашылығы министрі Синдзиро Коидзуми, сондай-ақ бұрынғы экономикалық қауіпсіздік министрі Такаюки Кобаяси, бұрынғы сыртқы істер министрі Тосимицу Мотэги және бұрынғы ішкі істер министрі Санаэ Такаити.
Киодо агенттігі үміткерлердің қысқаша сипаттамасын жариялады.
Хаяси «бейбітшіл әрі байсалды көзқарастарымен» және түрлі жылдары атқарған жоғары мемлекеттік қызметтердегі тәжірибесімен танымал, оның ішінде сыртқы істер министрі болған.
Мотэги де сыртқы саясат ведомствосын басқарған, агенттіктің дерегінше, АҚШ-тың бұрынғы президенті Дональд Трамп оны «қатаң келіссөз жүргізуші» деп атаған.
Кобаяси көзқарастары «консервативті» саясаткер ретінде сипатталады.
Синдзиро Коидзуми соңғы кезде күріш бағасының өсуімен күрес шараларымен назарға ілікті.
Санаэ Такаити қауіпсіздік мәселелерінде қатаң позициясымен белгілі және 1947 жылғы Жапония конституциясының милитаризмнен бас тартуды көздейтін 9-бабын қайта қарауды қолдайды. Агенттіктің хабарлауынша, ол Жапония тарихында премьер-министр лауазымын иеленген алғашқы әйел болуды мақсат етеді.
Сонымен бірге, ЛДП төрағалығына сайлану премьер-министр болуға автоматты түрде кепілдік бермейді, себебі партия парламенттегі көпшілігін жоғалтқан.
Жапония премьер-министрі Сигэру Исиба 7 қыркүйекте премьер-министр және ЛДП төрағасы қызметтерінен кету туралы шешім қабылдады. NHK телеарнасының хабарлауынша, ол бұл қадамға билеуші партия ішіндегі алауыздықты тереңдетпеу үшін барған.
Шілде айында Исиба жетекшілік еткен ЛДП бастаған коалиция парламенттің жоғарғы палатасында көпшілігінен айырылған еді. Исиба өзінің қызметтен кеткені туралы шешімді АҚШ-пен сауда тарифтері бойынша мәселені шешкеннен кейін жариялағанын мәлімдеді. Ол бұл жағдайды «ұлттық мүдде мәселесі» деп атап, шілдедегі сайлаудағы жеңіліс үшін саяси жауапкершілікті өз мойнына алғысы келгенін айтты.
