Мадрид, 22 қыркүйек. Лондон мен Париж Израиль билігіне ескерту жасап, Палестинаны мемлекет ретінде мойындағаны үшін Тель-Авив тарапынан ықтимал қысым немесе жазалау шаралары қолданылған жағдайда жауап қайтаруға дайын екенін мәлімдеді. Бұл туралы дүйсенбі күні ЭФЭ агенттігі хабарлады.
Ұлыбританияның сыртқы істер министрі Иветт Купер:
«Мен Израиль сыртқы істер министріне мұндай шаралар қабылдамауы керектігін анық жеткіздім. Біз Палестинаны мойындау туралы шешімді Израильдің де, палестиналықтардың да қауіпсіздігін қамтамасыз ету үшін қабылдадық», – деді. Оның айтуынша, бұл қадам Таяу Шығыста бейбітшілікті, әділеттілікті және қауіпсіздікті нығайтуға бағытталған.
Францияның сыртқы істер министрі Жан-Ноэль Барро да ұқсас мәлімдеме жасап, Париж кез келген қатаң шараға «барынша батыл жауап» беретінін атап өтті:
«Бұл Израильдің мүддесіне сай емес. Егер олар осындай қадамға барса, біз жауапсыз қалмаймыз. Бірақ мұндай жағдайға жетпейді деп үміттенемін», – деді ол. Барроның айтуынша, Палестинаны мойындау бастамасы Израильдің қауіпсіздігіне де үлес қосады.
Ұлыбритания Палестинаны мойындау туралы шешімді бір күн бұрын жариялады, ал Франция бұл қадамды дүйсенбі күні Нью-Йоркте басталатын БҰҰ Бас Ассамблеясының отырысында ресми түрде жариялауды жоспарлап отыр.
