Sаlem Entertainment медиа компаниясы хабарлайды: Sаlem Entertainment компаниясының кеңсесінде әлемдік кинематографияның аңызы – актер, сценарист, режиссер және продюсер Джеки Чанмен жұмыс кездесуі өтті. Біз ауқымды бірлескен жобаны іске асыруға кірістік. Алматыда болған уақытында Джеки Чан біздің командамен бірге алдағы картинаның түсірілім өтетін орындарын таңдады. Фильмнің негізгі бөлігі Қазақстанда түсірілмек. Жобаның толық мәліметтері әзірге жария етілмейді. Дегенмен, алдағы уақытта көрермендерді ауқымды әрі әсерлі туынды күтуде. Жаңалықтарымызды қадағалап отырыңыздар — қызықтың бәрі алда.
Евразия24 пікірі:
Backstreet Boys музыкалық квинтетімен қоштасып үлгермей жатып, Қазақстан тағы бір әлемдік деңгейдегі қонақты қарсы алды — бұл жолы аты аңызға айналған актер, режиссер әрі продюсер Джеки Чан елге ат басын бұрды. Кинематография саласында кең ауқымды халықаралық тәжірибесімен танымал өнер иесі өзінің фильмдерін Қытай, Жапония, Таиланд, Оңтүстік Корея, Үндістан, Малайзия, АҚШ, Канада, Ұлыбритания, Франция, Нидерланды, Испания, Оңтүстік Африка Республикасы, Аустралия және Марокко сынды түрлі елдерде түсірген. Дегенмен, бұған дейін Қазақстан бұл тізімде болмаған еді. Алматы қаласының Джеки Чан фильмдерінің түсірілім географиясына қосылуы еліміздің халықаралық имиджіне оң әсер етіп, Қазақстанның киноөндіріс үшін тартымды әрі сенімді серіктес екендігін көрсетеді. Бұл — қауіпсіз әрі қонақжай ортаны, сондай-ақ инвестициялық және шығармашылық мүмкіндіктерді ұтымды ұсынатын ел ретінде мемлекетіміздің беделін арттыра түсетін маңызды оқиға.
