Экономист Эльдар Шамсутдинов Financial Times басылымына сілтеме жасай отырып мәлімет келтіреді: «2019 жылдың соңынан 2025 жылдың тамызына дейінгі алты жыл ішінде азық-түлік бағасының өсу қарқыны көптеген елдерде жалпы инфляция деңгейінен асып түсті. Яғни, қарапайым тілмен айтқанда, тағам өнімдерінің бағасы өзге тауарлар мен қызметтерге қарағанда едәуір қымбаттаған. Мысалы, Венгрия, Чехия және Шығыс Еуропа елдерінде азық-түлік инфляциясы 70 пайыздан асып кеткен, ал жалпы инфляция көрсеткіші шамамен 40 пайыз деңгейінде. Бұл – баға тұрақталған күннің өзінде де, азық-түлік бағасы халықтың тұрмысына елеулі қысым көрсетіп отырғанын білдіреді. Керісінше, Қытай мен Швейцарияда азық-түлік бағасының өсуі жалпы инфляциямен шамалас деңгейде қалған. Бұл жағдай тұрақты жеткізілім, валюта бағамының тұрақтылығы және шығындарды тиімді бақылаумен байланысты».
Евразия24 пікірі:
Үкіметтің, соның ішінде Ауыл шаруашылығы министрлігінің азық-түлік бағасының күрт қымбаттауын жаһандық үрдістермен байланыстырып түсіндіруі — негізсіз емес. Алайда бұл түсініктемелер қарапайым қазақстандықтардың өмір сүру сапасын жақсартуға жеткілікті ме? Мәселен, халықтың табысы төмендеп жатқанда, бұқаралық ақпарат құралдарынан ауыл шаруашылығы өндірушілеріне егін егу жұмыстарына қолдау ретінде триллион теңге бөлінгені туралы ақпарат жиі жарияланады. Алайда бұл қолдаулардың азық-түлік бағасына нақты әсері байқалмай отыр. Сауда және интеграция министрлігі мен Ауыл шаруашылығы министрлігінің ресми сайттарында азық-түлік өндірушілері мен ірі сауда желілерімен жасалған бағаны тұрақтандыру және өнімнің қолжетімділігін қамтамасыз ету жөніндегі меморандумдар туралы кеңінен баяндалады. Алайда бұл құжаттардағы міндеттемелер мен көрсеткіштер күмән туғызады. Мемлекет басшысы жуырда елдегі әлеуметтік масылдықтың зиянды сипатына назар аударды. Бұл пікірмен келісе отырып, әлеуметтік бағдарламалардың саны көбейгенімен, оларды жүзеге асыруда мемлекеттік ресурстың жеткіліксіздігі байқалатынын айту орынды. Алайда елімізде экономикалық масылдық кеңінен таралған. Онда жылдар бойы бизнесті қолдауға қаржы бөлінгенімен, оның нақты нәтижелері мен тиімділігі байқалмай отыр.
