«Ұлттық ақпараттық технологиялар» АҚ-ның хабарлауынша, ақпараттық қауіпсіздікті қамтамасыз ету және пайдаланушыларды қорғау мақсатында 2025 жылдың қазан айынан бастап электрондық үкімет порталы – eGov.kz және оның құрамдас сервистері (eOtinish, «Ашық үкімет» порталы) бойынша авторизация тәртібі өзгерді. Енді пайдаланушы ЭЦҚ арқылы бірінші кезеңнен өткен соң, жеке басын 1414 қысқа нөмірінен келетін SMS-код арқылы растауы қажет. Бұл жаңа тәсіл азаматтардың деректерін қорғау деңгейін арттырып, ЭЦҚ кілтінен айырылған немесе үшінші тұлғалар тарапынан eGov.kz порталына рұқсатсыз кіру жағдайында қауіпсіздікті қамтамасыз етуге бағытталған. Авторизацияның екінші кезеңінен сәтті өту үшін пайдаланушының мобильді нөмірі порталдағы жеке кабинетке тіркелген болуы тиіс. Осыған байланысты SMS-кодты дұрыс қабылдау үшін азаматтарға өз ұялы байланыс нөмірінің eGov.kz жүйесіндегі жеке аккаунтына тіркелгенін тексеру ұсынылады.
Евразия24 пікірі:
Электрондық үкімет порталындағы қазақстандықтардың жеке кабинетін қорғау – цифрландырудың артуы және алаяқтық әрекеттердің күшеюі жағдайында бүгінгі күннің өзекті мәселелерінің бірі. Цифрлық қызметтерді пайдалануда тәжірибесі аз кей азаматтар электрондық цифрлық қолтаңба (ЭЦҚ), логин мен құпиясөз сияқты деректерін делдалдарға тапсырып, кейін оларды жаңартуға мән бермейді. Мұндай жағдайда жеке ақпараттың үшінші тұлғалардың қолына өтіп кету қаупі артады. «Ұлттық ақпараттық технологиялар» АҚ egov.kz порталындағы жаңа авторизация тәртібі – дәл осы тәуекелдерді алдын алуға бағытталған. Енді басқа адамның ЭЦҚ кілтін пайдаланған адамның иесіне ескертусіз порталға кіру мүмкіндігі жоқ, өйткені SMS-кодсыз авторизация жүргізілмейді. Бұл – электрондық кілтті иесінің келісімінсіз қолдануға жол бермейтін нақты тосқауыл. Осылайша, ЭЦҚ тек цифрлар жиынтығы ғана болып қалады да, қасақана пайдалануға жарамсыз құралға айналады.
