Иерусалим. 16 қазан. ИНТЕРФАКС – Израиль премьер-министрі Биньямин Нетаньяху Газа секторындағы уақытша бітім палестиналық қарулы топтарға қарсы күрестің толық аяқталғанын білдірмейтінін мәлімдеді.
«Біз бұл соғыстың барлық мақсатына міндетті түрде қол жеткіземіз», – деді ол бейсенбі күні 7 қазан күнгі шабуыл құрбандарын еске алуға арналған рәсімде сөйлеген сөзінде. Бұл туралы The Times of Israel басылымы хабарлады.
Премьер-министр күрестің әлі аяқталмағанын айтып, «толық жеңіске жетуге» және Газада қаза тапқан израильдік тұтқындардың мәйіттерін туған-туыстарына қайтаруға ниетті екенін жеткізді.
Сондай-ақ, Таяу Шығыстағы жағдайға тоқталған ол: «Біз әлі де қарулануға тырысып жатқан жаулар тарапынан төнетін елеулі қатерлерге тап болып отырмыз», – деп атап өтті. Сонымен қатар, ол көршілес араб мемлекеттерімен қарым-қатынасты қалыпқа келтіру үшін маңызды мүмкіндіктер бар екенін де айтты.
Бұған дейін Нетаньяху палестиналық ХАМАС қозғалысын қарусыздандыру – Газа секторындағы бейбітшілік процесіндегі келесі маңызды қадам екенін мәлімдеген еді. Егер бұл жүзеге аспаса, «нағыз хаос басталуы мүмкін» деген болатын. Алайда ХАМАС өкілдері әзірге қару тапсыруға дайын емес екенін жеткізген.
9 қазанға қараған түні АҚШ президенті Дональд Трамп Израиль мен ХАМАС қозғалысы АҚШ ұсынған Газа секторындағы қақтығысты реттеу жоспарының алғашқы кезеңіне келісім бергенін мәлімдеді. Бұл кезеңде израильдік тұтқындарды босату, палестиналық тұтқындарды айырбастау және Израиль әскерінің ішінара шегінісі қарастырылған. Нетаньяху кеңсесі Израиль үкіметінің ХАМАС-пен жасалған келісімнің алғашқы кезеңін мақұлдағанын хабарлады.
Қазіргі уақытта ХАМАС қозғалысы 20 тірі тұтқынды босатып, бірнеше қаза тапқан адамның денесін тапсырған. Өз кезегінде Израиль билігі шамамен 2 мың палестиналық тұтқынды түрмеден босатты.
2023 жылғы 7 қазанда ХАМАС тобы Израильге шабуыл жасады. Шабуыл салдарынан 1,2 мыңнан астам адам қаза тауып, 240-қа жуық адам тұтқынға алынды. Бұған жауап ретінде Израильдің Қорғаныс армиясы Газа секторында ХАМАС-қа қарсы әскери операция бастады.
