Астана. 16 қазан. ИНТЕРФАКС-ҚАЗАҚСТАН – 2025 жылғы 16 қазаннан бастап Қазақстанда барлық тұтынушы топтары үшін коммуналдық қызмет тарифтерін көтеру 2026 жылғы I тоқсанның соңына дейін уақытша тоқтатылды. Бұл туралы Үкіметтің баспасөз қызметі хабарлады.
Бейсенбі күні Мемлекет басшысының экономикалық реформалар бағдарламасын халық мүддесіне сай жүзеге асыруды реттеу жөніндегі тапсырмасын орындау мәселесі бойынша Үкімет отырысы өтті.
Отырыс қорытындысында бірқатар шешім қабылданды, соның ішінде – коммуналдық тарифтерді уақытша тоқтата тұру туралы.
«Тарифтердің өсуін тежеу табиғи монополия субъектілерінің операциялық шығындарын оңтайландыру есебінен жүзеге асырылады. Сонымен қатар, тұрғын үй-коммуналдық шаруашылық (ТКШ) жүйесіне қатысты барлық жоспарланған жөндеу жұмыстары белгіленген мерзімде аяқталуы тиіс», – делінген ресми хабарламада.
Бұдан бөлек, әлеуметтік маңызы бар азық-түлік тауарлары (ӘМАТ) бағасының өсуіне жол бермеу мақсатында тұрақтандыру қорларының жұмысы жандандырылады. Атап айтқанда, отандық ауыл шаруашылығы тауарын өндірушілерге берілетін қаржыландыру көлемі екі есеге ұлғайтылады. Бұл өз кезегінде ӘМАТ санатына жататын өнімдердің арзандауына ықпал етеді.
«Сонымен бірге, делдалдық тізбектерді қысқарту және сауда үстемелерін негізсіз көтеру фактілерін анықтау бойынша өңірлік комиссиялардың жұмысына ерекше назар аударылады», – деп толықтырды Үкіметтің баспасөз қызметі.
