Мәскеу. 16 қазан. ИНТЕРФАКС-ҚАЗАҚСТАН – «Транснефть» компаниясы Венгрия мен Сербия арасындағы мұнай құбырын жобалау және сараптамалық бағалау бойынша көмек көрсетуге дайын. Бұл туралы Ресей энергетикалық апталығы аясында компания вице-президенті Владимир Каланда мәлім етті.
«Қазіргі күрделі санкциялық жағдайда көмек көрсету қиын, дегенмен біз жобалау және қажет болған жағдайда жобаны сараптамалық бағалау бойынша өз мүмкіндіктерімізді ұсындық», – деді ол журналистерге.
Оның айтуынша, серіктестер бұл ұсынысты қарастыру үшін уақыт сұраған. «Егер бұл Еуропа қауымдастығының ережелеріне қайшы келмесе, біз бұл жобаға барынша қатысуға дайынбыз», – деп толықтырды Каланда.
Жоспарға сәйкес, мұнай құбыры 2027 жылы пайдалануға берілуі тиіс. Венгрия аумағында шамамен 180 шақырым жаңа инфрақұрылым, ал Сербия аумағында 120 шақырым құбыр салынады.
Бұған дейін, шілде айының басында, «Транснефть» пен венгрлік MOL компаниясы мұнай құбыры құрылысына қатысты техникалық сипаттамалардың сәйкестігі жөніндегі келісімге қол қойған болатын. Жақын арада жобаның коммерциялық параметрлері анықталуы тиіс.
