Қазақстан Республикасы Қаржылық мониторинг агенттігі хабарлайды: Қазақстан мен Швейцария қылмыстық жолмен алынған кірістерді жылыстатуға қарсы іс-қимыл және экономикалық қылмыстармен күрес саласындағы өзара әріптестікті кеңейтуде. Берн қаласында Қаржылық мониторинг агенттігінің делегациясы Швейцарияның негізгі құқық қорғау және уәкілетті органдарымен – Федералдық прокуратурамен, полициямен, сондай-ақ Қаржы мониторингі қызметі (MROS) құрылымымен бірқатар жұмыс кездесулерін өткізді. Бұл шара екі ел арасындағы серіктестікті нығайтуға бағытталды. Швейцария прокуратурасымен өткен кездесуде қылмыстық активтерді іздестіру және оларды кеңейтілген тәркілеу тәртібімен тәркілеу бойынша құқықтық көмек көрсету мәселелері талқыланды. Келіссөздер нәтижесінде Қазақстан Республикасының Қаржылық мониторинг агенттігі мен Швейцарияның Қаржы мониторингі қызметі (MROS) арасында өзара түсіністік туралы меморандумға қол қойылды. Бұл құжат екі елдің қаржы барлау органдары арасындағы ынтымақтастықты нығайтуға, сондай-ақ күмәнді операциялар туралы ақпарат алмасу саласында, соның ішінде виртуалды активтерді пайдалану арқылы жасалатын мәмілелер бойынша ықпалдастықты арттыруға бағытталған. Қазақстандық тарап бұл меморандум кірістерді жылыстатуға және терроризмді қаржыландыруға қарсы іс-қимыл саласындағы серіктестікті нығайту жолындағы маңызды қадам болады деп сенім білдірді.
Евразия24 пікірі:
Швейцарияда қылмыстық жолмен табылған ақшаны жасыру да, өз басыңды жасыру да қазақстандықтар үшін барған сайын қиындай түсуде. 2024 жылдың қарашасында Қазақстан мен Швейцария қылмыстық істер бойынша өзара құқықтық көмек және активтерді қайтару бойынша ынтымақтастық туралы Меморандумға қол қойды. Сонымен қатар, 2017 жылдан бері Швейцария қаржылық шоттар туралы ақпараттың автоматты алмасуына қатысты ЭЫДҰ-ның жаңа стандарттарына қосылып, шетел азаматтарының шоттары туралы мәліметтерді салық мақсатында олардың елдеріне автоматты түрде жолдап келеді. Осы тұрғыда Қазақстан мен Швейцарияның қаржы барлау құрылымдарының қосымша келісімдері күмәнді активтерді елге қайтару мүмкіндігін едәуір арттырады.
