Астана. 20 қазан. ИНТЕРФАКС-ҚАЗАҚСТАН – Қазақстанның АҚШ-тағы жаңа Төтенше және Өкілетті елшісі болып Мажан Ілиясов тағайындалды, деп хабарлады дүйсенбі күні Мемлекет басшысының баспасөз қызметі.
«Мемлекет басшысының Жарлығымен Ілиясов Мажан Жанботаұлы Америка Құрама Штаттарындағы Қазақстан Республикасының Төтенше және Өкілетті Елшісі қызметіне тағайындалды», – делінген хабарламада.
Сонымен қатар, Ілиясов Қазақстанның Ұлыбритания және Солтүстік Ирландия Біріккен Корольдігіндегі, Исландия мен Ирландиядағы (қоса атқарушы) елшісі қызметінен босатылды.
51 жастағы Ілиясов 1996 жылы Қазақ мемлекеттік әлем тілдері университетін, 2013 жылы Гарвард университетінің Джон Кеннеди атындағы мемлекеттік басқару мектебін тәмамдаған.
Ол дипломатиялық қызметін 1996 жылы референт лауазымынан бастап, кейін ҚР Сыртқы істер министрлігінің Халықаралық ұйымдар және халықаралық экономикалық қатынастар Бас басқармасында атташе ретінде жалғастырған. 1998–1999 жылдары БҰҰ және халықаралық экономикалық ұйымдар басқармасында үшінші, одан кейін екінші хатшы болып қызмет атқарды.
1999–2003 жылдары Президент әкімшілігінің протокол қызметінде кеңесші, 2003–2005 жылдары Президент әкімшілігінің ұйымдастыру және құжаттамалық қамтамасыз ету тобының бас сарапшысы болды. 2005–2012 жылдары Президент әкімшілігінің сыртқы саясат орталығында қызмет етті. 2013–2016 жылдары Президент кеңесшісі – сыртқы саясат орталығының меңгерушісі болды. 2016–2020 жылдары Қазақстанның Нидерландтағы елшісі және Химиялық қаруға тыйым салу ұйымындағы Қазақстанның Тұрақты өкілі қызметін қоса атқарды. 2020–2022 жылдары Қазақстанның БҰҰ жанындағы Тұрақты өкілі болды. 2022 жылдан бері Ұлыбритания, Ирландия және Исландиядағы елшілік қызметін атқарды.
Ілиясов – Төтенше және Өкілетті Елші дипломатиялық дәрежесінің иегері, ағылшын және неміс тілдерін меңгерген.
Айта кетейік, Қазақстанның АҚШ-тағы алдыңғы елшісі Ержан Ашықбаев қыркүйек айының соңында бұл қызметтен босатылып, қазан айында Сыртқы істер министрінің бірінші орынбасары қызметіне тағайындалды.
