Брюссель. 20 қазан. ИНТЕРФАКС – Бүгін Люксембургте өтетін Еуроодақ елдерінің сыртқы істер министрлерінің кездесуі мен бейсенбіге жоспарланған Брюссельдегі саммит қарсаңында Politico басылымының Еуропа редакциясы: Еуроодақтың Ресейдің бұғатталған активтерін Украинаға көмек ретінде пайдалану жөнінде келісімге келуі екіталай деп жазады.
Басылым үш еуропалық дипломатқа сілтеме жасай отырып: «Бұл активтерді пайдалану бойынша жедел келісімге келу ықтималдығы төмен, өйткені активтердің басым бөлігі сақталатын Бельгияның алаңдаушылығы мен Венгрияның қатаң қарсылығы сақталып отыр», – деп атап көрсетеді.
Люксембург пен Брюссельдегі жиындарда Ресейге қарсы жаңа санкциялар мен ресейлік активтерді Украина үшін «репарациялық несие» түрінде пайдалану мәселелері талқыланбақ.
Бұған дейін Politico басылымы Бельгия премьер-министрі Барт Де Вевердің Копенгагенде өткен бейресми ЕО саммитінде осындай жоспарларға байланысты алаңдаушылық білдіргенін хабарлаған еді. Оның айтуынша, Еурокомиссияның бұғатталған активтерді пайдалану схемасы – іс жүзінде конфискацияға тең. «Репарациялық несие мен конфискация арасында көзге көрінбейтін шекара бар. Егер активтер ұзақ уақыт бойы бұғатталған күйде болса, мұндай схема жартылай тәркілеу ретінде қабылдануы мүмкін», – деген Бельгия үкіметінің басшысы.
Сондай-ақ Де Вевер ЕО-дан өз елі үшін заңдық салдарларды болдырмауға бағытталған нақты кепілдіктерді талап еткен.
Financial Times газетінің жазуынша, ЕО елдері Бельгияны Ресейдің активтерін Украинаға көмекке бағыттауға келісім беру үшін қысымға алып отыр. Қазіргі таңда бұл активтер Бельгия аумағында орналасқан.
