Астана. 29 қазан. Интерфакс-Қазақстан – Мәжіліс сәрсенбі күнгі пленарлық отырыста Қазақстан Республикасы үкіметі мен Ресей Федерациясы үкіметі арасындағы 2010 жылы 9 желтоқсанда Қазақстанға мұнай мен мұнай өнімдерін жеткізу жөніндегі сауда-экономикалық ынтымақтастық туралы келісімнің күшін қайта жандандыру және оған өзгерістер енгізу туралы хаттаманы ратификациялау жөніндегі заң жобасын қарауға қабылдады.
Экология және табиғи ресурстарды пайдалану комитетінің төрағасы, мәжіліс депутаты Еділ Жаңбыршиннің айтуынша, аталған хаттама 2024 жылы 27 қарашада Астанада қол қойылған.
«Келісім аясында Ресейден мұнай өнімдерін кедендік бажсыз жеткізу мүмкіндігі қарастырылған. Бұл Қазақстанның ішкі нарығын қажетті жанар-жағармай көлемімен тұрақты қамтамасыз етуге мүмкіндік береді. Қазақстан мен Ресейдің энергетика министрліктері арасында келісілген индикативтік теңгерімге сәйкес мұнай өнімдерін импорттау жоспарланып отыр. Сондай-ақ келісімнің қолданылу мерзімі 2028 жылдың 1 қаңтарына дейін ұзартылмақ», – деді депутат.
