Астана. 29 қазан. Интерфакс-Қазақстан – Мәжіліс бүгінгі пленарлық отырыста «Тарихи-мәдени мұра объектілерін қорғау мәселелері бойынша кейбір заңнамалық актілерге өзгерістер мен толықтырулар енгізу туралы» заң жобасын бірінші оқылымда мақұлдады.
Құжат президент тапсырмаларын орындау мақсатында депутаттардың бастамасымен әзірленген. Заң жобасы археологиялық қызметті жүйелеуге және тарихи-мәдени мұраны қорғауға бағытталған.
Негізгі ұсыныстар бойынша археологиялық және ғылыми-реставрациялық жұмыстарды жүргізуге рұқсат беру тәртібі жаңартылады. Сонымен қатар зерттеулер қаржыландыру көздеріне қарай – жоспарлы және алдын алу (жоспардан тыс) болып бөлінбек.
Ел аумағындағы ескерткіштер мен археологиялық нысандар туралы деректерді біріздендіру үшін біртұтас автоматтандырылған ақпараттық жүйе құру көзделген. Археологиялық зерттеулерді үйлестіруді және ғылыми-әдістемелік қолдауды Ұлттық археология қызметі қамтамасыз етеді. Оның жұмысын Марғұлан атындағы Археология институты үйлестірмек.
Сондай-ақ, заң жобасында бүкіл ел көлемінде табылған жаппай археологиялық олжалар мен материалдарды Ұлттық депозитарийге тапсырып, орталықтандырылған түрде сақтау және есепке алу міндеттеледі.
