РИА Новости хабарлағандай, қазан айында америкалық долларға қатысты ең көп нығайған валюталардың қатарында қазақстандық теңге мен ресейлік рубль болды. Қыркүйек айының соңынан бері теңге долларға қатысты 3,6 пайызға нығайған. Осылайша ол ең көп күшейген үш валютаның біріне айналды. Сол тізімге ресейлік рубль (2,9%) және чили песосы (2,4%) да енген. Сонымен қатар оң динамика көрсеткен валюталар қатарында израиль шекелі, ботсван пуласы және колумбия песосы бар. Олардың әрқайсысы ай қорытындысы бойынша шамамен 1,6 пайызға нығайған. Қазан айын малайзиялық ринггит те өсіммен аяқтады – оның долларға шаққандағы бағамы 0,6 пайызға артқан. Ал ең көп әлсіреген валюталар арасында аргентиналық песо көш бастап тұр – оның бағамы бірден 5,7 пайызға төмендеген. Сондай-ақ жапон иенасы 3,6 пайызға, исланд кронасы 3,4 пайызға әлсіреген. Күз ортасында долларға қатысты ең әлсіреген бес валютаның қатарына британ фунты (2,3%) мен оңтүстіккорей воны (1,8%) да кірді.
Евразия24 пікірі:
Теңге мен рубльдің долларға қатысты нығаюына айқын экономикалық түсіндірме бар. Қазақстандық The Tenge порталының сарапшыларының пікірінше, айырбас бағамындағы оң өзгеріс ең алдымен ішкі ақша-кредиттік факторлармен байланысты. Нақтырақ айтқанда, Ұлттық банктің базалық мөлшерлемені 16,5 пайыздан 18 пайызға көтеру туралы шешімі негізгі себептердің бірі болды. «Ақша-несие саясатының мұндай ауқымды қатаюы – реттеуші тарапынан нарыққа берілген нақты сигнал. Бұл – инфляцияны тежеу және соңғы айларда ұлттық валютаның әлсіреуі мен инфляцияның үдеуіне байланысты күшейіп кеткен инфляциялық күтулерді тұрақтандыру ниетін білдіреді», – дейді сарапшылар. Ал рубльге қатысты жағдай өзгеше. «Біздің жағдайда айырбас бағамы нарықтық емес, сондықтан оны экономикалық тұрғыдан болжау қиын. Қараша айында шамамен осындай деңгей сақталады деп ойлаймын, бәлкім, аздап әлсіреуі мүмкін. Объективті тұрғыдан алғанда, рубльдің долларға шаққандағы бағамы төмендеуі тиіс. Менің болжамымша, шамамен 81–82 деңгейінде болуы ықтимал», – деген пікір білдірді қаржы сарапшысы Михаил Беляев. Дегенмен, әлемдік валюталар арасындағы бәсекеде доллармен қатар үздіктер қатарында аталу – аз болса да жағымды белгі.
