Пекин, 4 қараша. – Интерфакс. Ресей мен Қытай Арктика мәселелері бойынша ынтымақтастықты нығайтып, осы өңірде бейбітшілік пен тұрақтылықты сақтауға ықпал етпек. Бұл жөнінде Ресей мен Қытай үкіметтері басшыларының отызыншы тұрақты кездесуі қорытындысы бойынша қабылданған бірлескен коммюникеде айтылған.
«Тараптар Арктика мәселелері бойынша ынтымақтастықты дамытуға, соның ішінде Ресей мен Қытай үкіметтері басшыларының тұрақты кездесулеріне дайындық жөніндегі Ресей–Қытай комиссиясы жанындағы Солтүстік теңіз жолы бойынша ынтымақтастық жөніндегі қосалқы комиссия шеңберінде өзара іс-қимылды күшейтуге уағдаласты. Бұл өзара іс-қимыл жоғары ендіктердегі кеме қатынасы қауіпсіздігін арттыруға, полярлық кемелер мен технологияларды әзірлеуге, кадрларды даярлауға, Солтүстік теңіз жолы арқылы жүк тасымалы көлемін ұлғайтуға және оны басқа халықаралық теңіз бағыттарымен салыстырғанда бәсекеге қабілетті етуге бағытталмақ», – делінген құжатта.
Сонымен қатар тараптар Арктикадағы бейбітшілік пен тұрақтылықты сақтауға және өңірдің тұрақты дамуына жәрдемдесуге келісті.
Ресей мен Қытай халықаралық құқық пен өзара құрмет қағидаттарына сүйене отырып, Арктикалық кеңес және өзге де халықаралық алаңдар аясында конструктивті ынтымақтастықты ілгерілетуді көздеп отыр.
