Брюссель. 4 қараша. ИНТЕРФАКС – Еуропалық одақ кеңесі сейсенбі күні Украинаға арналған қор аясында 1,8 миллиард еуродан астам сомаға бесінші траншты бөлу туралы шешім қабылдады.
«Бұл қаржыландырудың негізгі мақсаты – Украинаның макроқаржылық тұрақтылығын нығайту және мемлекеттік басқару органдарының үздіксіз жұмысын қолдау», – делінген кеңестің жариялаған коммюникесінде.
Брюссельде атап өтілгендей, Украинаға арналған қор 2024 жылдың 1 наурызында іске қосылған және 2024–2027 жылдар аралығында елдің қалпына келуін, қайта құрылуын және жаңғыртылуын қолдау үшін гранттар мен несиелер түрінде 50 миллиард еуроға дейін тұрақты қаржыландыруды көздейді.
Осы сомадан шамамен 32 миллиард еуро Украина жоспары аясында қарастырылған реформалар мен инвестицияларды қолдауға бағытталған. Төлемдер осы жоспарға енгізілген мақсатты көрсеткіштердің орындалуына байланысты жүзеге асырылады, – деп түсіндірілген құжатта.
Еуропалық комиссия 2025 жылғы 29 қыркүйекте Украина ұсынған төлем сұрауын бағалағаннан кейін, Еуроодақ кеңесі Киевтің Украина жоспарына енгізілген бірқатар реформаларды қанағаттанарлық деңгейде орындағаны туралы қорытындыға келген. Олардың қатарында сот жүйесін жетілдіру, сыбайлас жемқорлық пен ақшаны жылыстатуға қарсы күрес, қаржы нарығын дамыту, адами капитал, бизнес ахуалын жақсарту, децентрализация және өңірлік саясат, энергетика секторы, маңызды шикізатты басқару, «жасыл» трансформация және қоршаған ортаны қорғау реформалары бар.
