Манама. 18 қазан. ИНТЕРФАКС – Ресей Парсы шығанағындағы қауіпсіздікті қамтамасыз етудің басты жолы жағалаудағы мемлекеттер мен оларға көршілес елдер арасындағы тікелей диалог деп есептейді. Мұндай диалогқа жағдай жасауға аймақтан тыс елдерді, қажет болған жағдайда БҰҰ Қауіпсіздік Кеңесінің мүшелерін де тартуды ұсынады. Бұл туралы Ресейдің сыртқы істер министрі Сергей Лавров мәлімдеді.
«Әлемдік стратегиялық маңызы зор бұл аймақтың қауіпсіз дамуын қамтамасыз ету жолдарын айқындауда шешуші сөз Парсы шығанағы жағалауындағы мемлекеттердің өзіне тиесілі болуы керек деп санаймыз. Сондықтан біз шығанақ жағалауындағы елдер мен олардың Ирак және Иордания сияқты көршілері арасында тікелей диалог орнатуға қажетті жағдай жасауды басты назарда ұстаймыз», – деді Лавров Ресей мен Парсы шығанағы араб мемлекеттерінің ынтымақтастық кеңесі арасындағы стратегиялық диалогтың тоғызыншы министрлік отырысында.
Ресей СІМ басшысының айтуынша, Мәскеу мұндай диалогты дамытуға аймақтан тыс тараптарды да қатыстыруды ұсынады.
«Өздеріңіз білетіндей, бұл жұмысқа Араб мемлекеттері лигасы мен Ислам ынтымақтастығы ұйымының басшылығын да тартуды ұсынып отырмыз. Егер сіздер мүдделі болсаңыздар, осы үдеріске қолдау көрсету үшін БҰҰ Қауіпсіздік Кеңесінің тұрақты мүшелері де қатыса алады», – деді ол.
Лавров Ресейдің аймақта ауқымды соғыстың қайта басталуына жол бермеуге бағытталған бітімгерлік бастамаларды, соның ішінде осы жиынға қатысып отырған мемлекеттердің күш-жігерін қолдайтынын атап өтті.
«Біз Парсы шығанағы аймағында ұжымдық қауіпсіздікті қамтамасыз ету жөніндегі жаңартылған тұжырымдамамызды осы іске қосқан үлесіміз деп санаймыз», – деді министр.
Оның айтуынша, аталған құжаттың бұған дейінгі нұсқалары бірнеше ондаған жыл бойы Парсы шығанағы араб мемлекеттерінің ынтымақтастық кеңесіне мүше елдердің саяси, ғылыми және сарапшылық қауымдастықтары өкілдерімен талқыланып келген.
