Астана. 5 қараша. – Қазақстан премьер-министрі Олжас Бектенов Астанада Беларусь премьер-министрі Александр Турчинмен ресми кездесу өткізіп, екі ел арасындағы сауда-экономикалық ынтымақтастықты дамыту перспективаларын талқылады, деп хабарлайды ҚР Үкіметінің баспасөз қызметі.
Кездесу барысында тараптар екіжақты тауар айналымын арттыру, инвестициялар, өнеркәсіп, ауыл шаруашылығы, цифрлық индустрия және жасанды интеллект бағыттарында өзара іс-қимылды тереңдету, сондай-ақ көлік және логистика, денсаулық сақтау, туризм және басқа салалардағы ынтымақтастықты дамыту жоспарларын қарастырды.
Олжас Бектенов Қазақстан Үкіметі екі ел арасындағы сауда-экономикалық және өзге де байланыстардың өзара тиімді негізде белсенді дамуы үшін барлық жағдай жасайтынын атап өтті.
Өз кезегінде Александр Турчин Беларусь үшін Қазақстанның сауда-экономикалық қатынастардағы маңызды және басым серіктес екенін айтты. Оның сөзінше, осы сапар екіжақты диалогты тереңдетуге қосымша серпін береді.
Келіссөздер барысында өнеркәсіптік кооперация, бірлескен жобаларды іске асыру, цифрлық трансформация саласында тәжірибе алмасу, сондай-ақ ауыл шаруашылығы саласында өзара іс-қимыл, оның ішінде қайта өңдеу және аграрлық ғылым саласындағы ынтымақтастық мәселелері талданды.
Көлік және логистика саласындағы әріптестікке ерекше көңіл бөлінді. Тараптар теміржол және автокөлік тасымалы тұрақты жұмыс істеп тұрғанын, алайда жаңа экспорттық нарықтарға шығуға мүмкіндік беретін көлік дәліздерін дамыту әлеуеті зор екенін атап өтті.
Сонымен қатар аймақаралық ынтымақтастық пен мәдени-гуманитарлық байланыстар мәселелері қарастырылды.
Кездесу қорытындысы бойынша келесі құжаттарға қол қойылды:
•2026–2028 жылдарға арналған өнеркәсіптік кооперация саласындағы ынтымақтастықты дамыту жөніндегі Қазақстанның Индустрия және құрылыс министрлігі мен Беларусьтің Өнеркәсіп министрлігі арасындағы жол картасы;
•Астана әкімдігі мен Минск қалалық атқару комитеті арасындағы 2026–2028 жылдарға арналған сауда-экономикалық, ғылыми-техникалық және мәдени ынтымақтастық жөніндегі жол картасы;
•Алматы облысы әкімдігі мен Витебск облыстық атқару комитеті арасындағы сауда-экономикалық, ғылыми-техникалық және мәдени-гуманитарлық саладағы ынтымақтастық туралы меморандум.
