Астана. 6 қараша. ИНТЕРФАКС-ҚАЗАҚСТАН – Қазақстан Республикасының сыртқы істер министрі Ермек Көшербаев Орталық Азия елдерінің сыртқы саяси ведомстволары басшыларының АҚШ мемлекеттік хатшысы Марко Рубиомен өткен кездесуіне қатысты. Бұл кездесу “С5+1” форматындағы мерейтойлық саммит қарсаңында өтті, деп хабарлайды бейсенбі күні ҚР Сыртқы істер министрлігінің баспасөз қызметі.
Келіссөз барысында тараптар кеңейтілген стратегиялық әріптестік перспективаларын және екіжақты күн тәртібіндегі сауда-экономикалық, инвестициялық ынтымақтастықты нығайту мәселелерін талқылады.
“Кездесу барысында Қазақстан АҚШ-тың Орталық Азиядағы жетекші экономикалық әріптесі екені атап өтілді. Егемендік жылдарында елімізге тартылған тікелей америкалық инвестициялардың жалпы көлемі 60 миллиард АҚШ долларынан асып, бұл көрсеткіш өңір бойынша тікелей инвестициялардың 80%-дан астамын құрап отыр”, – делінген министрлік таратқан хабарламада.
Келіссөздерде “С5+1” форматы аясындағы өңірлік ынтымақтастық мәселелеріне де баса назар аударылды.
Министр Ермек Көшербаев бұл диалог алаңы құрылған он жыл ішінде Орталық Азияда өзара сенімді, түсіністік пен өркендеуді нығайтуға ықпал ететін тиімді құралға айналғанын атап өтті.
Кездесу барысында сондай-ақ мемлекет басшыларының алдағы уақытта екіжақты және көпжақты форматтарда өтетін кездесулеріне дайындық мәселелері қаралды.
АҚШ тарапы өңірлік ынтымақтастықты тереңдетуге және тұрақты дамуды қамтамасыз етуге бағытталған бірлескен бастамаларды жүзеге асыруда әріптестікке қолдау көрсетуге дайын екенін жеткізді, делінген хабарламада.
