Астана. 6 қараша. ИНТЕРФАКС-ҚАЗАҚСТАН – Қазақстан Парламентінің Сенаты бейсенбі күнгі жалпы отырыста «Мәдениет, білім беру, отбасы және мемлекеттік бақылау мәселелері бойынша кейбір заңнамалық актілерге өзгерістер мен толықтырулар енгізу туралы» заң жобасын екінші оқылымда қарап, өз түзетулерімен Мәжіліске қайтарды.
Сенаторлар енгізген маңызды өзгерістердің бірі – концерттік, ойын-сауық және мәдени-бұқаралық іс-шаралар кезінде ұйымдастырушыларға, шығармашылық ұжымдарға және орындаушыларға вокалдық фонограммаларды қолдануға тыйым салу. Бұл тыйым тележазбалар мен арнайы концерт өткізуге арналмаған орындардан басқа жағдайларға қолданылады. Сонымен қатар музыкалық туындылар фонограммамен орындалатын жағдайда, көрерменді алдын ала хабардар ету талап етіледі.
Бұдан бөлек, бұқаралық ақпарат құралдары мен онлайн-платформаларда авторлық құқық нысаны болып табылатын шығармаларды көпшілікке жария қолдану кезінде автордың аты-жөнін көрсету талаптары қазіргі қолданыстағы заңнамаға сәйкестендірілді.
Сенаттың түзетулері бойынша, енді аудандық (облыстық маңызы бар қалалар) деңгейдегі жергілікті атқарушы органдар мемлекеттік орта білім беру ұйымдарының құрылысын, қайта жаңғыртуын және күрделі жөндеуін жыл сайын қаржыландыру тізімінен алынып тасталды.
Бұған дейін Мәжіліс депутаты Асхат Аймағамбетов бұл заң жобасында халықаралық ғылыми жобалар байқауларының жеңімпазы атанған дарынды оқушылар мен олардың тәлімгерлеріне бір реттік сыйақы төлеу нормасы қарастырылғанын хабарлаған болатын. Жобаға сәйкес, жеңімпаздарға берілетін сыйақының ең жоғары мөлшері шамамен 6 миллион теңгені құрамақ.
Сонымен қатар заң жобасында жеке меншік білім беру ұйымдарына атау беру және өзгерту кезінде ономастикалық комиссиямен келісу рәсімін енгізу көзделген.
Жаңа түзетулер аясында еліміздегі оқушыларға «Ақылман» атты арнайы жеңілдік картасын енгізу ұсынылуда. Бұл карта мәдениет мекемелеріне жеңілдікпен баруға мүмкіндік береді.
Сондай-ақ мемлекеттік кітапханаларға білім беру және мәдени шараларды ақылы түрде өткізу құқығы беріледі.
Бұған қоса, түзетулерге сәйкес, мүмкіндігі шектеулі баланы тәрбиелеп отырған түлектер мемлекеттік білім беру грантын өтеу міндетінен босатылады.
