Астана. 6 қараша. ИНТЕРФАКС-ҚАЗАҚСТАН – Қазақстан Парламентінің Сенаты бейсенбі күнгі пленарлық отырыста зияткерлік меншік мәселелері бойынша кейбір заңнамалық актілерге өзгерістер мен толықтырулар енгізу туралы Мәжіліс қабылдаған заң жобасын екі оқылымда қарап, мақұлдады.
Осылайша, заң Парламент тарапынан толық қабылданды және қол қою үшін Мемлекет басшысына жолданатын болады.
Сенаттың Конституциялық заңнама, сот жүйесі және құқық қорғау органдары жөніндегі комитетінің қорытындысында көрсетілгендей, заңның мақсаты – зияткерлік меншікті қорғау және құқықтарын қамтамасыз ету саласындағы заңнаманы жетілдіру, зияткерлік меншікті дамытуға қолайлы жағдай жасау, инвестиция тарту және креативті экономиканы өркендету.
Құжатта эфирлік және кабельдік хабар тарату ұйымдарының туындыларды, соның ішінде оларды қайта тарату құқығын нақтылайтын ерекше құқықтарына қатысты құқықтық нормалар көзделген.
Заң тауарлық белгіге өтінім беру рәсімін жеделдетілген тәртіпте сараптамадан өткізу механизмін енгізуді қарастырады. Атап айтқанда, алдын ала жеделдетілген сараптама он жұмыс күні ішінде жүргізіледі (бұрын – бір ай), ал толық жеделдетілген сараптама үш ай ішінде аяқталуы тиіс (бұрын – жеті ай).
Бұдан бөлек, тауарлық белгіні тіркеуге қарсы қарсылық білдіру мерзімі екі айға дейін ұзартылды (қазіргі уақытта – бір ай). Сонымен қатар тіркеуден бас тарту негіздері нақтылады.
Заңдағы маңызды жаңалықтардың бірі – бірыңғай цифрлық платформаны енгізу туралы норма. Бұл платформаның енгізілуі, басқарылуы, ақпараттық мазмұны, сүйемелдеуі және жүйелік-техникалық қызметін Қазақстанның Зияткерлік меншік жөніндегі ұлттық институты жүзеге асыратын болады.
