Қазақстан Республикасы Сыртқы істер министрлігінің хабарлауынша, Минск қаласындағы «Победа» кинотеатрында Беларусьтегі Қазақстан Елшілігінің қолдауымен «Лiстапад» Минск халықаралық кинофестивалі аясында Қазақстан кинематографиясы күніне орай «Дос-Мұқасан» музыкалық драмасының көрсетілімі өтті. Фильм кеңестік дәуірдің символына айналып, қазақ рокының бастауында тұрған аты аңызға айналған вокалды-аспапты ансамбльге арналған. Іс-шараға Беларусь Республикасының Мәдениет министрлігінің өкілдері, дипломатиялық корпус, Минскідегі қазақ диаспорасының мүшелері, сондай-ақ қала мектептері мен жоғары оқу орындарының оқушылары қатысты. Шынайы оқиғаларға негізделген бұл музыкалық драма Қазақ политехникалық институтының студенттері құрған вокалды-аспапты ансамбльдің құрылу тарихын баяндайды. Фильм жас музыканттардың алғашқы табыстарынан бастап, тыйымдар мен оқу барысындағы қиындықтарға, сондай-ақ ғалым болу мен шығармашылық жолындағы танылу арасындағы күрделі таңдауға дейінгі жолын көрсетеді. Фильмде тарихи және музыкалық шынайылықты сақтау үшін режиссерлік топ кейіпкерлер бейнесінің дәлдігіне ерекше мән берген — актерлер нақты ансамбль мүшелеріне ұқсастығы негізінде іріктелген. Сонымен қатар, картинаға шынайылық беру мақсатында ансамбльдің негізін қалаушылар Мурат Құсайынов пен Досым Сүлейев кеңесші ретінде шақырылған.
Евразия24 пікірі:
Режиссер Айдын Сахаман мен сценарист Ефрат Шәріпов түсірген «Дос-Мұқасан» көркем фильмі Қазақстанда алғаш рет 2022 жылдың қыркүйегінде, Мәдениет және спорт министрлігі мен Ұлттық киноны қолдау мемлекеттік орталығының қолдауымен кең экранға шыққан болатын. Сол кезде ансамбльдің негізін қалаушылардың бірі Досым Сүлейев түсіру тобының еңбегін ерекше атап өткен еді: «Мен бұл фильмді көріп шықтым. Өте қатты әсер етті. Мен ансамбльдің мүшесі ретінде барлық оқиғаны жақсы білемін. Сол бір жылдарға қайта оралғандай болдым. Көзіме жас келді. Жасырын болып келген, сырт көзге байқалмаған көптеген жайттар — біз көрген қиындықтар, стильді сақтап қалудағы күрес, кеңестік идеологиямен қайшылық, ішкі келіспеушіліктер мен өкпе-наз — барлығы дерлік боямасыз көрсетілген» . Туындының енді Минск қаласында көрсетілуі де бекер емес. Өйткені фильмде ерекше орын алатын тарихи сәттердің бірі – 1973 жылы дәл осы Минскіде өткен эстрадалық ән мен вокалды-аспаптық ансамбльдердің Бүкілодақтық байқауына «Дос-Мұқасан» тобының қатысуы. Сол байқауда олар Беларусь елінің мақтанышы, аңызға айналған «Песняры» ансамблі және оның көркемдік жетекшісі Владимир Мулявинмен жүздескен. ҚР Сыртқы істер министрлігінің хабарлауынша, дәл осы эпизод минскілік көрерменнің ерекше қызығушылығын тудырған. Біздің ойымызша, бұл таңқаларлық жайт емес. Қазақстан мен Беларусь елдерінің шығармашылық қауымдастықтары — ұлттың төл өнері мен жұмысшы жастар құрған ансамбльдердің мұрасын қадір тұтатын, мәдениетке бейіл орта. Әр кезеңнің тынысын жеткізе білген өнер ұжымдарының шынайы болмысы – бүгінгі ұрпаққа да шабыт берер мұра.
