МӘСКЕУ. 12 қараша. ИНТЕРФАКС – Қазақстан мен Ресей мұнай мен мұнай өнімдері саласындағы әріптестікті нығайтуға келісті, сондай-ақ газ жеткізу мен оны үшінші елдерге тасымалдау мәселелері егжей-тегжейлі талқыланды. Бұл туралы Қазақстан Президенті Қасым-Жомарт Тоқаев Ресей Президенті Владимир Путинмен келіссөздердің қорытындысы бойынша мәлімдеді.
«Біз мұнай мен мұнай өнімдерін, көмірді, электр энергиясын өндіру, тасымалдау және жеткізу саласындағы әріптестікті нығайту жөнінде уағдаластық. Газ саласындағы ынтымақтастықты, соның ішінде Ресеймен шекаралас қазақстандық өңірлерді газбен қамтамасыз ету және газды үшінші елдерге транзиттеу мәселелерін егжей-тегжейлі талқыладық», – деді Мемлекет басшысы.
Қос ел арасындағы мемлекетаралық қатынастарды жан-жақты стратегиялық серіктестік пен одақтастық деңгейіне көтеру туралы декларация мәтінінде: «Тараптар мұнай мен мұнай өнімдерін, табиғи газды, көмір мен электр энергиясын өндіру, тасымалдау және жеткізу бағыттары бойынша энергетика саласындағы серіктестікті одан әрі нығайтуды жалғастырады» делінген.
Сондай-ақ құжатта екі елдің экономикалық және энергетикалық қауіпсіздігін қамтамасыз ету мақсатында энергия ресурстарын кедергісіз тасымалдау үшін қолайлы жағдайлар жасау, бірлескен энергетикалық жобаларды іске асыру, соның ішінде жаңа кен орындарын барлау мен игеру және экономикалардың энергия тиімділігін арттыру бағытындағы жұмыс жалғасатыны атап өтілген.
Тараптар газ саласындағы әріптестікке, соның ішінде газды үшінші елдерге тасымалдау мәселесіне және маңызды трансшекаралық энергетикалық инфрақұрылымды сенімді қорғауға ерекше мән беретін болады. Бұған дейін Ресей Қазақстан аумағы арқылы Қытайға жылына 35 млрд текше метр газ жеткізетін магистральды газ құбырын салуды ұсынған болатын.
Сондай-ақ тараптар Қазақстанның солтүстік және шығыс өңірлерін газдандыру жобасының өзекті бағыт екенін және оның уақтылы әрі сапалы жүзеге асырылуының маңызын ерекше атап өтті.
Қазақстан мен Ресей Каспий құбыр консорциумының (КҚК) үздіксіз және тұрақты жұмыс істеуінің маңыздылығына баса назар аударды. Бұл құбыр консорциумы аймақтың энергетикалық тұрақтылығын қамтамасыз етуде және экономикалық ынтымақтастықты дамытуда маңызды рөл атқарады. Ресей аумағы арқылы өтетін КҚК Қазақстан мұнайының шамамен 80 пайызын экспорттауға мүмкіндік беріп отыр.
