Астана. 19 қараша. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Ішкі істер министрі Ержан Саденовті қабылдап, ол елдегі криминогендік жағдай мен ІІМ алдында тұрған міндеттердің орындалу барысы туралы баяндады. Бұл туралы Мемлекет басшысының баспасөз қызметі сәрсенбі күні хабарлады.
Министрдің айтуынша, биылғы он айдың қорытындысы бойынша елдегі қылмыс саны 5,3 мыңға азайған.
«Қылмыстың барлық негізгі түрлері бойынша көрсеткіштер төмендеді, олардың ашылу деңгейі жақсарды. Отбасы-тұрмыстық қатынастар саласындағы құқықбұзушылықтармен күрес күшейтілді. Алдын алу жұмыстарының нәтижесінде тұрмыстық қылмыстар саны 8%-ға, ал кісі өлтіру фактілері 26%-ға қысқарды», – делінген баспасөз хабарламасында.
Сонымен қатар, Ержан Саденов іздеуде жүрген 1 391 адамның ұсталғанын мәлімдеді, оның 138-і шетелде болған.
«Жедел іс-шаралар барысында 30 тоннадан астам есірткі, соның ішінде бір тоннадан астам синтетикалық заттардың заңсыз айналымына жол берілмеді», – делінген мәліметте.
Ұйымдасқан қылмыспен күрес шеңберінде ауыр және аса ауыр қылмыстар жасаған 185 қылмыстық топ таратылды.
Интернет-алаяқтыққа қарсы күрес аясында 12 колл-орталық жойылды, олардың жетеуі шетелде орналасқан. Сонымен бірге, шамамен 83 миллион фрод-қоңырау мен 4 мың алаяқтық сайт бұғатталды, алаяқтардың 2,3 миллиард теңгені шоттардан шығаруының алдын алынды.
Министр жол қауіпсіздігі мен қоғамдық тәртіпті қамтамасыз ету саласына цифрлық шешімдерді енгізу бойынша жүргізіліп жатқан шаралар туралы да баяндады.
Мысалы, дрондардың көмегімен 6 мыңнан астам, ал орташа жылдамдықты өлшеу жүйелері арқылы 190 мыңнан астам жол қозғалысы ережелерін бұзу фактісі анықталған.
«Қабылданған кешенді шаралар жол-көлік оқиғаларындағы өлім-жітім көрсеткішін 9,4%-ға, ал мас күйінде көлік жүргізген жүргізушілердің кінәсінен болған өлім жағдайларын 24%-ға төмендетуге ықпал етті», – делінген хабарламада.
Сондай-ақ, министр экстремизмге қарсы іс-қимыл және көші-қон бақылауын қамтамасыз ету бағытындағы жұмыстар туралы баяндады.
Өз кезегінде Мемлекет басшысы елдегі құқықтық тәртіп пен қоғамдық қауіпсіздікті одан әрі арттыру бойынша бірқатар тапсырма берді.
