Астана. 19 қараша. ИНТЕРФАКС-ҚАЗАҚСТАН – ҚР Парламенті Мәжілісі сәрсенбі күнгі жалпы отырыста «Тарихи-мәдени мұра объектілерін қорғау мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» заң жобасын екінші, соңғы оқылымда қабылдады.
Құжатқа берілген қорытындыға сәйкес, заң жобасы Мемлекет басшысының археологиялық қызметті ретке келтіру жөніндегі тапсырмасын орындау аясында әзірленген және тарихи-мәдени мұра объектілерін қорғау мен пайдалану саласындағы заңнаманы жетілдіруге бағытталған.
Заңның негізгі ережелері археологиялық және ғылыми-реставрациялық жұмыстарға лицензия беру тәртібін өзгертуді, сондай-ақ археологиялық зерттеулерді қаржыландыру көздеріне байланысты жоспарлы және алдын ала (жоспардан тыс) деп екіге бөлуді көздейді.
Археологиялық ескерткіштер мен объектілер туралы ақпаратты жүйелендіру мақсатында бірыңғай автоматтандырылған ақпараттық жүйе құрылады. Археологиялық қызметті үйлестіретін, археологтарға ғылыми-кеңестік және ақпараттық-талдамалық қолдау көрсететін Ұлттық археологиялық қызмет құрылатын болады.
Сонымен қатар, түзетулерге сәйкес ел аумағында жиналған археологиялық олжалар мен материалдар жаппай түрде Ұлттық депозитарийге тапсырылады. Бұл жерде олар орталықтандырылған түрде сақталып, есепке алынады.
Қабылданған заң жобасы Сенаттың қарауына жолданды.
