АСТАНА. 19 қараша. ИНТЕРФАКС-ҚАЗАҚСТАН – 2025 жылдың қаңтар-қазан айларында Қазақстанда азық-түлік өндірісі 9%-ға ұлғайып, 3,1 трлн теңгеге жетті. Бұл туралы Мемлекет басшысы Қасым-Жомарт Тоқаев пен ауыл шаруашылығы министрі Айдарбек Сапаров арасындағы кездесуден кейін Президенттің баспасөз қызметі хабарлады.
“2025 жылдың 10 айында азық-түлік өндірісі 9%-ға өсіп, 3,1 трлн теңгені құрады. Осы кезеңде агроөнім экспорты $4,7 млрд-қа дейін артты”, – делінген сәрсенбі күні таратылған хабарламада.
Министр соңғы екі жылда агроөнеркәсіптік кешендегі жағдайды жақсарту бағытында қабылданған шаралар туралы баяндады. Атап айтқанда, айналым қаражатын толықтыру мен ауыл шаруашылығы техникасын лизингке алу үшін 5% мөлшерлемемен тікелей несиелеу тетігі енгізілді.
Президенттің тапсырмасымен АӨК-ті қаржыландыру көлемі 1 трлн теңгеге дейін ұлғайтылды. Оның ішінде 250 млрд теңге ауыл шаруашылығы техникасын жеңілдікпен лизингке алуға бағытталған.
2025 жылы 25 мыңнан астам техника сатып алынып, ауыл шаруашылығы техникасының тозу деңгейі 90%-дан 70%-ға дейін төмендеді.
Мемлекет басшысы министрлікке саланың тиімділігін арттыру және елдің азық-түлік қауіпсіздігін нығайту жөнінде бірқатар нақты міндеттер жүктеді.
19 қарашадағы ресми валюта бағамы – 1 АҚШ доллары үшін 521,01 теңге.
