Токио. 21 қараша. ИНТЕРФАКС – Жапония Үкіметі жалпы көлемі 21,3 трлн иенге (135,27 млрд доллар) тең экономиканы қолдау шараларының жаңа пакетін бекітті. Бұл COVID-19 пандемиясынан бері қабылданған ең ауқымды ынталандыру шараларының бірі болды.
Жаңа үкіметті басқаруға кіріскен Санаэ Такаити бұл бастамаларды халықтың өмір сүру құнының өсуіне байланысты туындаған қиындықтарды жеңілдету мақсатында қолға алды.
Қолдау шаралары пакетіне азаматтарға тікелей көмекті қамтитын қысқа мерзімді шаралармен қатар, ұзақ мерзімді бастамалар да енгізілген. Қысқа мерзімді қолдауға электр энергиясы шығындарын субсидиялау және әрбір балаға 20 мың иен мөлшерінде бір реттік төлемдер жатады. Ұзақ мерзімді шаралар қатарында табыс салығын төлеу шегін арттыру және бензинге салынатын уақытша акцизді алып тастау бар.
Үкіметтің болжамынша, бұл шаралар ақпаннан сәуірге дейінгі аралықта инфляция деңгейін орта есеппен 0,7 пайыздық пунктке төмендетуге ықпал етеді.
Сонымен қатар, мемлекет қорғанысқа, табиғи апаттардың салдарын жоюға, сондай-ақ жартылай өткізгіштер өндірісі мен жасанды интеллект саласындағы жобаларға қосымша инвестициялар бөлуді жоспарлап отыр.
Үкіметтің мәлімдеуінше, қабылданған ынталандыру пакеті алдағы үш жыл ішінде Жапонияның ЖІӨ өсімін жыл сайын орта есеппен 1,4 пайыздық пунктке арттыруға мүмкіндік береді.
