Брюссель. 25 қараша. ИНТЕРФАКС-КАЗАХСТАН – Еуропалық автокөлік өндірушілер қауымдастығының (ACEA) хабарлауынша, 2025 жылғы қазан айында Еуропалық Одақта (ЕО) жаңа автокөліктердің сатылымы өткен жылдың сәйкес кезеңімен салыстырғанда 5,8%-ға өсті.
Ай ішінде ЕО елдерінде 916,6 мың жаңа жеңіл көлік тіркелген. Өткен жылдың қазан айында бұл көрсеткіш 866,1 мыңды құраған болатын.
Испанияда автокөлік сатылымы 15,9%-ға, Германияда – 7,8%-ға өсті. Францияда өсім 2,9%-ды құрады, ал Италияда керісінше – 0,5%-ға төмендеді.
Еуропа бойынша жалпы (ЕО елдері, сондай-ақ Исландия, Норвегия, Швейцария және Ұлыбритания) автокөлік сату көлемі 4,9%-ға өсіп, 1,09 млн бірлікті құрады. Ұлыбританияда сатылым 0,5%-ға ұлғайып, 144,95 мың автокөлікке жетті.
Электромобильдерге деген сұраныс айтарлықтай артты – ЕО бойынша олардың сатылымы 38,6%-ға өсіп, 173,17 мың бірлікті құрады.
Volkswagen тобы (оның құрамына Skoda, Audi, Seat, Porsche және басқалары кіреді) ЕО нарығындағы сатылымын 7,9%-ға ұлғайтты, Stellantis – 6,6%, Renault – 10%, BMW AG – 8,7%, Mercedes-Benz – 2%-ға арттырды. Ал Toyota Group сатылымы 10,8%-ға, Ford Motor – 8,8%-ға төмендеді. Hyundai Group 0,1%-ға өсім көрсетті. Tesla компаниясы Еуропалық одақта қазан айында 5,65 мың көлік сатқан, бұл өткен жылмен салыстырғанда 48%-ға аз. Қытайлық BYD компаниясы керісінше, сатылымын үш есеге жуық арттырып, 13,35 мың көлік өткізген. Қаңтар–қазан аралығында ЕО елдерінде автокөлік сатылымы 1,4%-ға өсіп, 8,974 млн бірлікке жетті. Электромобильдердің жалпы сатылымдағы үлесі 16,4%-ды құрап, өткен жылғы 13,2%-бен салыстырғанда едәуір артқан.
