Астана. 25 қараша. ИНТЕРФАКС-ҚАЗАҚСТАН – Қазақстан Республикасының Премьер-министрі Олжас Бектенов Үкімет отырысында бес трансшекаралық хабты құру бойынша жұмысты жеделдетуді тапсырды, деп хабарлайды агенттік тілшісі.
«Жұмыстың қарқынын арттырып, барлық мүдделі тараптар арасындағы өзара іс-қимылды едәуір жақсарту қажет», – деді Үкімет басшысы сейсенбі күні өткен отырыста.
Оның айтуынша, кешенді тәсіл арқылы бұл жобалар капитал мен жаңа өндірістерді тарту орталығына айналмақ.
«Хабтар аумағында тек логистика, қоймалау және жүк ауыстырып тиеу ғана емес, нақты өндірістер мен жұмыс орындарының құрылуы маңызды», – деп атап өтті Бектенов.
Ол Индустриялық сауда-логистикалық кешен (Қырғызстанмен шекарада) мен «Еуразия» трансшекаралық сауда орталығы (Ресеймен шекарада) базасында арнайы экономикалық аймақ (АЭА) құру тұжырымдамасын 20 желтоқсанға дейін әзірлеуді Индустрия министрлігіне мүдделі мемлекеттік органдармен және әкімдіктермен бірлесіп тапсырды.
Сауда және интеграция министрі Арман Шаққалиевтің мәлімдеуінше, бес хабтың іске қосылуы шекаралас мемлекеттермен сауда процестерін айтарлықтай жеделдетіп, шикізаттық емес экспорт көлемін 30%-ға арттыруға және қазақстандық компаниялар үшін тиімді логистикалық жағдайлар жасауға мүмкіндік береді.
Өзбекстанмен шекарада екі ел арасындағы тауар айналымын $10 млрд-қа дейін жеткізуге бағытталған «Орталық Азия» атты халықаралық өндірістік кооперация орталығы құрылуда.
Шығыста Қытаймен шекарадағы «Хоргос» хабы дамып келеді. Ол құрамына «Халықаралық шекара маңы ынтымақтастығы орталығы «Хоргос» АЭА және «Хоргос – Шығыс қақпасы» АЭА-ны қамтиды. Мұнда өткізу қабілетін арттыру мақсатында SkyHansa халықаралық әуежайы мен жаңа логистикалық кешендер салынып жатыр.
Сонымен қатар, Каспийлік хаб дамып келеді: Ақтау мен Құрық порттарында контейнерлік хаб пен «Саржа» көпфункционалды терминалы салынуда.
Батыс Қазақстан облысында Ресейге экспортқа бағдарланған «Еуразия» трансшекаралық сауда орталығы жұмыс істеп тұр, ал Жамбыл облысында «Батыс Еуропа – Батыс Қытай» бағыты бойында Қырғызстанмен шекарада тауар ағындарын өңдеуге және бөлуге арналған Индустриялық сауда-логистикалық кешен құрылуда.
