Астана. 25 қараша. ИНТЕРФАКС-ҚАЗАҚСТАН – Маңғыстау облысының Қарақия ауданында құны $300 млн болатын жаңа теңіз портын салу жоспарлануда. Бұл туралы өңір әкімі Нұрдәулет Қилыбай Үкімет отырысында мәлімдеді.
«Аталған жоба Қытай – Қазақстан – Ақтау – Баку – Поти – Еуропа бағыты бойынша жаңа халықаралық көлік дәлізін қалыптастыруға ықпал етеді. Оның іске асырылуы жүк жеткізу мерзімін 7–15 күнге дейін қысқартып, көлік шығындарын 18–25%-ға дейін төмендетуге және жаңа жұмыс орындарын ашуға мүмкіндік береді», – деді әкім.
Қилыбайдың айтуынша, жобаның стратегиялық серіктесі – Қытайдың “Чжунъюн Интернешнл” компаниялар тобы. Қазіргі таңда инвестор өңірде компаниясын тіркеп, инвестициялық келісімшартқа қол қою үшін құжаттарын дайындап жатыр.
Жобаны іске асыру мерзімі – 2025–2028 жылдар аралығы. Жаңа порттың жобалық қуаты – жылына 25 млн тонна жүк.
