Астана. 25 қараша. ИНТЕРФАКС-ҚАЗАҚСТАН – Қазақстан Каспий теңізі арқылы контейнерлік жүк тасымалын арттыру мақсатында Әзірбайжаннан сыйымдылығы 700 контейнерге дейінгі екі жүк кемесін сатып алуды жоспарлап отыр. Бұл туралы еліміздің көлік министрі Нұрлан Сауранбаев Үкімет отырысында мәлім етті.
«Каспий теңізі арқылы контейнерлік тасымалды 2027 жылға дейін ұлғайту мақсатында Әзірбайжаннан екі кемені сатып алу жоспарлануда», – деді министр.
Оның айтуынша, «Каспийлік торап» жобасы аясында Ақтау және Құрық теңіз порттарын жаңғырту жұмыстары қарқынды жүріп жатыр. Жыл соңына дейін Қытайдың Ляньюньган компаниясымен бірлесіп Ақтау портында контейнерлік хабтың алғашқы кезеңінің құрылысы аяқталады.
Жоба толық іске асқан кезде хабтың жылдық өткізу қабілеті 200 мың контейнерге дейін жетпек.
Сонымен қатар, Ақтау портында айлақтарды жаңғырту және су түбін тереңдету жұмыстары жүргізілуде. Құрық портында көпфункционалды «Саржа» терминалының құрылысы жалғасуда.
Оған қоса, порттарға апаратын теміржол желісінің өткізу қабілеті де артып келеді.
