26 қараша, Гонконг. ИНТЕРФАКС — Тайвань билігі қару-жарақ сатып алуға 40 миллиард АҚШ доллары көлемінде арнайы бюджет бөлуді жоспарлап отыр. Бұл туралы 26 қараша күні Associated Press агенттігі хабарлады. Тайвань әкімшілігінің басшысы Лай Циндэ сәрсенбі күні аталған бастаманы жария етіп, бөлінетін қаржының бір бөлігі әуе шабуылына қарсы қорғаныс жүйесін (ПВО «куполын») құруға бағытталатынын мәлімдеді. Оның айтуынша, Қытай тарапынан Тайвань мен жалпы Индо-Тынық мұхиты аймағына төнетін қауіп-қатер күшейіп отыр. Осыған байланысты Тайвань өзінің қорғаныс қабілетін арттырып, ұлттық қауіпсіздігін қамтамасыз ету үшін барынша жауапкершілік алуға дайын екенін көрсетуі тиіс.
Арнайы бюджет жыл сайын бекітілетін қорғаныс шығындарынан бөлек ұсынылып отыр және оны енді Тайваньның заң шығарушы органдары мақұлдауы қажет.
Еске сала кетейік, Тайвань мәселесі 1949 жылы Қытай Халық Республикасы құрылғаннан кейін туындады. Сол кезде Қытайдағы Гоминьдан партиясының бір бөлігі Тайвань аралына қоныс аударып, онда өзін Қытай Республикасының үкіметі деп жариялады. Қытай Халық Республикасы «біртұтас Қытай» қағидатын ұстанып, халықаралық қауымдастықтың ҚХР мен Тайваньды бір уақытта мойындауына үзілді-кесілді қарсы. Алайда әлемнің көптеген ірі мемлекеттерінде Тайбэйдің бейресми мәдени және экономикалық өкілдіктері жұмыс істейді.
