Вашингтон. 7 желтоқсан. ИНТЕРФАКС – АҚШ президенті Дональд Трамптың есірткі тасымалдауға қатысы бар делінген кемелерге соққы беруі және Венесуэлаға қарсы құрлықтағы әскери операция жүргізу туралы мәлімдемесі республикалық партияның кейбір өкілдері арасында алаңдаушылық тудырып отыр, деп хабарлайды The Washington Post.
Басылымның мәліметінше, MAGA (Make America Great Again – «Американы қайтадан ұлы елге айналдырамыз») қозғалысының мүшелері Трамптың бастамалары ел ішіндегі мәселелерден назарды басқа жаққа бұрып жіберуі мүмкін деп санайды. Бұл жағдай 2026 жылғы аралық сайлауларда республикалық партияның ұстанымына кері әсер етуі ықтимал.
Газет атап өткендей, АҚШ әкімшілігі Венесуэлаға бағытталған шараларды заңсыз есірткі айналымына қарсы күрес аясында жүзеге асырып жатқанын алға тартады. Алайда, Венесуэла АҚШ-қа есірткі жеткізетін негізгі елдердің қатарына кірмейді.
Бұрынғы және қазіргі америкалық лауазымды тұлғалардың мәліметінше, Венесуэлада өндірілетін есірткі заттарының өте аз бөлігі ғана АҚШ аумағына түседі.
The Washington Post деректеріне сәйкес, АҚШ-тағы фентанилдің басым бөлігі Мексикадан, ал кокаин – Колумбиядан жеткізіледі.
