Ауыл шаруашылығы министрлігі хабарлағандай, Біріккен Ұлттар Ұйымының Азық-түлік және ауыл шаруашылығы ұйымы (ФАО) шегірткеге қарсы мониторинг пен күрес жүйесін күшейту мақсатында Фитосанитариялық диагностика және болжамдар жөніндегі республикалық әдістемелік орталыққа арнайы жабдықтар табыстады. Жабдықтар TCP/KAZ/4006 «Шегіртке ошақтарын бақылау мен мониторингті күшейтуге арналған техникалық қолдау» жобасы аясында жеткізілген. Берілген техника шегіртке зиянкестері туралы деректерді жинау, өңдеу және визуализациялау сапасын арттыруға мүмкіндік береді. Ноутбуктер оқыту жұмыстарына және далалық зерттеулерге пайдаланылса, сыртқы деректер тасымалдағыштары геокеңістіктік ақпаратты қауіпсіз сақтауға арналған. Ал ұшқышсыз ұшу аппараттарына арналған қосымша аккумуляторлар стационарлық электр көздері жоқ шалғай аумақтарда мониторинг жүргізуді қамтамасыз етеді. Сонымен қатар Жапонияның халықаралық ынтымақтастық агенттігі (JICA) қаржыландыратын ФАО-ның Кавказ бен Орталық Азия елдерінде шегірткеге қарсы ұлттық және өңірлік күресті жетілдіруге бағытталған GCP/INT/384/JCA жобасы аясында Орталыққа халықтың хабардарлығын арттыруға арналған ақпараттық материалдар да тапсырылды. Бұл материалдарда пестицидтерді қауіпсіз қолдану жөніндегі ұсынымдар қамтылған. ФАО-ның Қазақстандағы бағдарламалар үйлестірушісі Жаныл Бозаева аталған жабдықтар мен материалдар шегіртке індеттерінің алдын алу және мониторинг жүргізу бағытында ұлттық қызметтердің әлеуетін нығайтуға ықпал ететінін атап өтті. Оның айтуынша, бұл шаралар азық-түлік қауіпсіздігін қамтамасыз ету мен ауыл шаруашылығының орнықты дамуы үшін ерекше маңызға ие.
Евразия24 пікірі:
Жалпы, ФАО-ның техникалық қолдауынсыз да Қазақстанда соңғы жылдары шегірткеге қарсы күрес қомақты шығынмен жүргізіліп келеді. 2025 жылы егіс алқаптарын өңдеуге және арнайы техниканы сатып алуға бюджеттен шамамен 7 млрд теңге жұмсалды. Ал 2024 жылы зиянкестің таралуының алдын алу және оны оқшаулау шаралары салық төлеушілерге 4 млрд теңгеге түскен. Тікелей қаржыландырудан бөлек, соңғы екі жылда мемлекеттік қолдау есебінен бүркуге арналған техника мен дрондар паркі 400 бірлікке дейін ұлғайды. Айта кету керек, ФАО Орталық Азия елдеріне, соның ішінде Қазақстанға тек техникалық тұрғыда ғана көмек көрсетіп отырған жоқ. Қазіргі таңда БҰҰ-ның Азық-түлік және ауыл шаруашылығы ұйымымен бірлесіп, зиянкестердің жаппай таралуын болжауға және салдарын барынша азайту үшін қарсы шараларды оңтайландыруға бағытталған ғылыми-зерттеу жұмысы аясында жасанды интеллектке негізделген мониторинг жүйесі әзірленіп жатыр.
