Брюссель. 17 желтоқсан. ИНТЕРФАКС – Еуропада таралып жатқан тұмаудың жаңа түрі аймақ елдерінің денсаулық сақтау жүйесіне айтарлықтай жүктеме түсіріп отыр. Бұл туралы сәрсенбі күні Дүниежүзілік денсаулық сақтау ұйымының (ДДҰ) Еуропалық өңірлік бюросының директоры Ханс Клюге мәлімдеді.
Оның айтуынша, тұмау қыс мезгілінде жыл сайын тіркелгенімен, биылғы эпидемиологиялық ахуалдың ерекшелігі бар. «Қазіргі жағдай ауру қоздырғышындағы тіпті шамалы генетикалық өзгерістердің өзі денсаулық сақтау жүйесіне айтарлықтай қысым әкелуі мүмкін екенін көрсетіп отыр», – дейді Ханс Клюген.
ДДҰ өкілі тұмау маусымының шарықтау шегі желтоқсан айының соңы немесе қаңтардың басына сәйкес келуі мүмкін екенін атап өтті. Сонымен қатар ол жағдайдың күрделі екенін мойындай отырып, бұл ахуал COVID-19 пандемиясы кезіндегідей жаһандық төтенше жағдай деңгейіне жетпейтінін айтты.
Ұйымның деректеріне сәйкес, Еуропада тіркелген тұмау жағдайларының шамамен 90 пайызы A(H3N2) вирусына тиесілі.
Францияның денсаулық сақтау органдары бұл штаммның әртүрлі жас топтары арасында жоғары деңгейде таралып жатқанын хабарлаған. Испанияда жергілікті бұқаралық ақпарат құралдарының мәліметінше, биыл тұмау жұқтыру көрсеткіші өткен жылғы деңгейден асып кеткен. Ал Германияда медициналық қызмет өкілдері тұмау маусымы әдеттегіден 2–3 апта бұрын басталғанын атап өтуде.
Осы күні Ресей Денсаулық сақтау министрлігіне қарасты А.А. Смородинцев атындағы Тұмау ғылыми-зерттеу институты директорының ғылыми жұмыс жөніндегі орынбасары Дарья Даниленко елде тұмау мен жедел респираторлық вирустық инфекциялардың маусымдық өсуі байқалып отырғанын мәлімдеді. Оның айтуынша, алдағы апталарда сырқаттану деңгейі одан әрі артуы мүмкін.
Ағымдағы маусымда Ресейде және Солтүстік жартышардың басым бөлігінде, соның ішінде Солтүстік Америка мен Еуропада A(H3N2) вирусы белсенді айналымда. Бұл вирус «гонконг тұмауы» атауымен белгілі және бүгінде әлемде тұрақты түрде таралып жүрген маусымдық тұмаудың негізгі қоздырғыштарының бірі саналады. Аталған вирустың тез өзгеру қабілеті жоғары болғандықтан, тұмауға қарсы вакциналардың құрамын үнемі жаңартып отыру және халықты жыл сайын екпемен қамту қажеттілігі сақталып отыр.
