Астана. 19 желтоқсан. Интерфакс-Қазақстан — Астана мен Токио Қазақстандағы геологиялық барлау, өндіру және аса маңызды минералдарды өңдеу салаларындағы ынтымақтастықты дамыту перспективаларын талқылауда. Бұл туралы Қазақстан Президентінің баспасөз қызметі хабарлады.
Баспасөз қызметінің мәліметінше, жұма күні Токиоға сапармен барған Қазақстан Президенті Қасым-Жомарт Тоқаев Жапонияның Металдар мен энергетикалық қауіпсіздік жөніндегі ұйымының (JOGMEC) төрағасы Итиро Такахараны қабылдады.
«Кездесу барысында геологиялық барлау, аса маңызды минералдарды өндіру және өңдеу, сондай-ақ табиғи ресурстарды орнықты басқару салаларындағы ынтымақтастықты дамыту перспективалары талқыланды», — делінген кездесу қорытындысы бойынша таратылған хабарламада.
Баспасөз қызметінің мәліметінше, Мемлекет басшысы JOGMEC ұйымының Қазақстанда жобаларды іске асыруға жоғары қызығушылық танытып отырғанын атап өтті.
Сондай-ақ ұйымның Қазақстан аумағындағы геологиялық барлау жобаларына қатысуын кеңейту мүмкіндігі, оның ішінде JOGMEC өкілдігін ашу мәселесі қарастырылды. Президенттің пікірінше, бұл бірлескен жобаларды тиімді үйлестіруге және жапондық өнеркәсіптік әрі технологиялық компаниялардың Қазақстан нарығына белсенді қатысуына ықпал етеді.
JOGMEC — Жапонияның энергетикалық және минералдық-шикізаттық қауіпсіздігіне жауапты негізгі мемлекеттік институт. Ұйым мұнай, газ, сутегі, аммиак және сирек жер металдарының тұрақты жеткізілімін қамтамасыз ету саласында мемлекеттік оператордың функцияларын атқарады.
