Мәскеу. 21 желтоқсан. Интерфакс — Ресей Президенті Владимир Путин алдағы екі күнін Санкт-Петербургте өткізеді. 21 желтоқсанда қалада Жоғары Еуразиялық экономикалық кеңестің отырысы, ал 22 желтоқсанда Тәуелсіз Мемлекеттер Достастығының бейресми саммиті өтеді.
Кремльдің баспасөз қызметінің хабарлауынша, Еуразиялық экономикалық одақтың саммитінде бірлестіктің ағымдағы қызметіне қатысты өзекті мәселелер талқыланып, интеграциялық үдерістерді одан әрі тереңдету мен Одақтың ортақ нарығын дамыту бағыттары айқындалады. Сондай-ақ бірқатар маңызды құжаттар мен шешімдерді қабылдау жоспарланған.
Атап айтқанда, Еуразиялық экономикалық одақ пен Индонезия арасындағы еркін сауда туралы келісімге қол қойылады деп күтілуде.
Еуразиялық экономикалық одақ құрамына Армения, Ресей, Беларусь, Қазақстан және Қырғызстан кіреді.
Сонымен қатар дүйсенбі күні Ресей президентінің бастамасымен Санкт-Петербургте Тәуелсіз Мемлекеттер Достастығына мүше елдер басшыларының дәстүрлі бейресми кездесуі өтеді.
Сапар аясында Владимир Путин бірқатар мемлекет басшыларымен екіжақты кездесулер де өткізеді.
Бұған дейін Бішкекте Тәжікстан Президенті Эмомали Рахмонмен кездескен кезде Владимир Путин ТМД елдерінің басшылары үшін Санкт-Петербургте мазмұнды мәдени бағдарлама ұйымдастырылатынын айтқан еді.
«Біз әрбір республикамен байланысты жақсы бағдарлама дайындаймыз. Кеңес Одағы кезеңінен бері бұрынғы одақтас республикалар халықтары үшін мәдени әрі тарихи құндылығы бар дүниелер көп сақталған. Солармен танысу сіздер үшін қызықты боларына сенімдімін», — деген болатын Владимир Путин Эмомали Рахмонға.
