Астана. 23 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Бас прокуратура, Мемлекеттік күзет қызметі және Ішкі істер министрлігінің бірқатар қызметкерлеріне пәтер кілттерін табыс етті. Бұл туралы сейсенбі күні Мемлекет басшысының баспасөз қызметі хабарлады.
Салтанатты рәсім барысында Қасым-Жомарт Тоқаев ұлттық қауіпсіздікті қамтамасыз ету, азаматтардың құқықтарын қорғау және қоғамдық тәртіпті сақтау стратегиялық маңызы бар міндеттер екенін атап өтті.
«Сіздер елдегі тұрақтылық пен тыныштықты сақтауға зор үлес қосып келесіздер, әділеттілікті қамтамасыз ету және қоғамда “Заң мен тәртіп” қағидатын орнықтыру жолында аянбай еңбек етудесіздер. Қызмет жағдайының күрделілігіне қарамастан, сіздер мемлекетке жоғары кәсібилікпен әрі үлкен жауапкершілікпен адал қызмет етіп жүрсіздер. Баршаңызға шынайы алғысымды білдіремін», – деді Президент.
Мемлекет басшысы мінсіз қызмет әрдайым лайықты бағалануы тиіс екенін атап өтіп, мемлекет өз ісіне адал азаматтарды қолдауды жалғастыратынын айтты.
