Policia.kz хабарлайды: «16-17 наурыз аралығында Вена қаласында БҰҰ-ның Есірткі және қылмыс жөніндегі басқармасы Интерполмен бірлесіп ұйымдастырған Интернет-алаяқтыққа қарсы күрес жөніндегі жаһандық саммит өтті. Іс-шараға 130-дан астам мемлекеттің өкілдері, 17-ден астам министр, сондай-ақ 40-тан астам халықаралық компания мен ұйым қатысты. Аталған саммитке еліміздің атынан ІІМ Киберқылмысқа қарсы іс-қимыл департаментінің өкілдері қатысты (…). Жиынға қатысушылар интернет-алаяқтықтың қазіргі үрдістерін, қылмыстық схемаларға қарсы іс-қимыл шараларын, сондай-ақ құқық қорғау органдарының халықаралық ұйымдармен және жеке сектор өкілдерімен өзара іс-қимыл мәселелерін талқылады. Қазақстандық тараптың қатысуы халықаралық ынтымақтастықты нығайтуға, озық тәжірибе алмасуға және алаяқтық пен киберқылмыстың өзге де түрлеріне қарсы іс-қимыл бойынша бірлескен шараларды әзірлеуге бағытталған».
Еуразия24 пікірі:
Киберқылмыстың трансшекаралық сипатына байланысты қазақстандық құқық қорғау органдары мен қаржылық технологиялар саласы үшін БҰҰ-ның Есірткі және қылмыс жөніндегі басқармасы мен Интерпол сияқты халықаралық пікірталас алаңдарында озық тәжірибе жинақтаудың маңызы зор. Еуразия кеңістігіндегі барлық елдер үшін киберқылмыс сын-қатерлері ұқсас: олар – телефон алаяқтығы, фишинг және кірістерді заңдастырудың трансшекаралық схемалары. Алайда қылмыстық желілер әрдайым бірнеше юрисдикция аясында әрекет етеді. Сондықтан мемлекеттік шекараларға қарамастан, бірлескен операциялар туралы халықаралық келісімдер құқық қорғау органдары жұмысының тиімділігін арттырады. Дегенмен, бір мәселе ескерусіз қалып отыр: киберқылмыс әдетте бір қадам алда жүреді. Ол әлдеқайда икемді, өйткені қатаң реттеуші талаптарға тәуелді емес. Сонымен қатар бұл салада экономикалық ынталандыру жоғары, ал тәуекел деңгейі салыстырмалы түрде төмен және қаржылық қайтарымы мол. Сондықтан құқық қорғау органдары арасындағы өзара іс-қимыл, алаяқтық схемаларды анықтаудағы тәсілдерді үйлестіру және жаңа қатерлерге жедел әрекет ету ерекше маңызға ие. Мұндай тәжірибені тек өз шеңберінде қалып қою арқылы меңгеру мүмкін емес.
