Еуразиялық даму банкі сарапшы Мәди Алданазаровтың пікірін жариялады: «Тұрақты даму мақсаттарына қол жеткізу үшін дамушы елдер жыл сайын шамамен 4 трлн доллар көлеміндегі қаржы тапшылығына тап болады. Көпжақты даму банктері (КДБ) арасындағы ынтымақтастық осы мәселені шешудің ең тиімді жолдарының біріне айналуы мүмкін. КДБ өз күш-жігерін біріктіре отырып, инвестиция көлемін арттыруға, білім мен тәжірибе алмасуға және ірі жаңа жобаларды бірлесе бастауға қауқарлы. КДБ арасындағы тығыз байланыс қаржылық және сараптамалық олқылықтарды жоюға, бәсекелестік пен бір-бірінің жұмысын қайталауды болдырмауға мүмкіндік береді. Жалпы алғанда, ынтымақтастық көлденең (тең дәрежелі банктер арасында) және тік (ірі және шағын банктер бірлесіп жұмыс істегенде) бағытта болуы мүмкін. Біз КДБ арасындағы серіктестікті дамытудың 7 бағытын атап өтеміз: капиталды жұмылдыру (ірі даму жобалары бойынша қаржылық жүктемені бөлісу үшін); капитал нарықтары (қаражат тарту үшін); ұлттық валютада қаржыландыруға жәрдемдесу (қатысушы елдердің тәуекелдерін азайту және ұлттық қаржы жүйелерінің тиімділігін арттыру үшін); жобаларға сараптама жасау (озық тәжірибе алмасу үшін); бірлескен зерттеу жобалары (ынтымақтастықтың жаңа көкжиектерін ашу және білімді біріктіру үшін); бірлескен немесе үйлестірілген техникалық көмек (жаңа жобаларды іске қосу үшін); трансшекаралық жобаларды бірлесе жүзеге асыру (мұнда КДБ негізгі рөл атқарып, жобалардың көптеген тәуекелдерін төмендетеді). КДБ-ның тиімді ынтымақтастығы — дамушы елдердің жедел әрі тұрақты өсуінің кепілі».
Евразия24 пікірі:
Еуразиялық даму банкі, Азия даму банкі, Азия инфрақұрылымдық инвестициялар банкі, Дүниежүзілік банк және басқа да қаржы институттары деңгейіндегі өзара іс-қимыл — инвестициялық қолдаудың мүлдем жаңа құрылымы, әсіресе мемлекетаралық бірлестіктер үшін бұл өте маңызды. ЕАЭО — ауқымды нарық болғанымен, әзірге біртұтас инвестициялық кіру нүктесі жоқ. Сондықтан көпжақты даму банктері (КДБ) арасындағы ынтымақтастық қазірдің өзінде ұжымдық қаржылық қолдауы бар интеграциялық жобаларға басымдық беріп отыр. Бұл даму институттары әр елді жеке қаржыландырған кезде туындайтын инвестициялық тәуекелдерді айтарлықтай төмендетеді. Сонымен қатар, даму институттарының қолдауы — жеке капиталдың келуіне кепілдік беретін фактор екенін ескеру қажет. Жеке инвестор ірі қаржылық серіктесі бар аймаққа сеніммен келеді. Трансшекаралық жобалар — ЕАЭО-ның басты бәсекелестік артықшылықтарының бірі. «Еуразияшылдық» капиталының көлемі жағынан Еуроодақпен немесе Қытаймен бәсекелесе алмауы мүмкін, бірақ нарықтардың байланыстылығы тұрғысынан әлеуеті жоғары. Ал даму институттарының бірлестігі түріндегі негізгі қаржылық кепіл болған жағдайда, салынған әрбір доллар инвесторларға 3-тен 5 долларға дейін табыс әкелуі мүмкін.
