КазТАГ хабарлайды: Вице-премьер – Ұлттық экономика министрі Серік Жұманғарин Қазақстан–Ресей шекарасында жүк көліктерінің жиналуына байланысты жедел кеңес өткізді. Бұл туралы ҚР Премьер-министрінің ресми ақпараттық ресурсы мәлімдеді. Кеңесте талқыланған негізгі мәселе – Ресей Федерациясына кіреберістегі өткізу бекеттерінде жүк көліктерінің жиналып қалуы және жүргізушілердің Ресейдің көші-қон заңнамасындағы жаңа нормаларға байланысты шағымдары. Қалыптасқан жағдайды сыртқы саудаға кедергі ретінде тану туралы өтінішпен Қазақстан Еуразиялық экономикалық комиссияға (ЕЭК) жүгінді. Ресми ақпаратқа сәйкес, қазақстандық тарап бұл мәселе бойынша Ресей Федерациясымен түрлі деңгейде келіссөздер жүргізіп жатыр. 7 қазанда Серік Жұманғарин Ресей Федерациясының Қазақстандағы төтенше және өкілетті елшісі Алексей Бородавкинмен кездесу барысында Қазақстан–Ресей шекарасындағы жүк көліктерінің жиналу мәселесін көтерді. Екі тарап та қалыптасқан қиындықтарды бірлесіп және жедел шешуге дайын екенін білдірді. Үкімет хабарламасында: «ЕЭК-ке қазіргі жағдайды сыртқы саудаға кедергі келтіретін тосқауыл ретінде тану туралы ресми өтініш жолданды», – делінген. Аталған мәселені 13 қазанда ЕЭК отырысында, сондай-ақ 7 қарашада өтетін Қазақстан мен Ресей арасындағы Ынтымақтастық жөніндегі үкіметаралық комиссияның 26-отырысында талқылау жоспарланған. Қолда бар деректерге сүйенсек, жағдай Ресейде қыркүйек айынан бастап “сұр” импортты анықтауға бағытталған рейдтік іс-шаралардың басталуынан кейін күрделене түскен. Осыған байланысты жүк көліктерін тексеру уақыты едәуір ұзарған, бұл өз кезегінде шекарадағы кептелістерге алып келді.
Евразия24 пікірі:
Қазақстан мен Ресей шекарасында 7,5 мыңнан астам жүк көлігі жиналды. Олар Қазақстан, Қытай және басқа елдерден Ресейге тауар тасымалдауда. Кептеліс бірнеше күн бойы Ресей аумағына кіреберісте сақталып отыр. Ресми түсініктеме әлі берілген жоқ. Алайда түрлі болжамдар тарауда. Солардың бірі, Ресей кеден қызметінің барлық жүктің құрамы мен құжаттарын мұқият тексере бастауы. Бұл шара Қытайдан келген екі жүк көлігінен шамамен 3 мың дрон мен құрамдас бөлшек табылғаннан кейін күшейтілген. Приморье кеденшілері 2 ұшақ типіндегі дрон, 2,7 мың квадрокоптер және 200-ден астам бөлшекті тәркілеген. Қазақстан мен Ресей шекарасында орын алған жүк көліктерінің жиналуына Ресей тарапынан енгізілген қатаң тексеру шаралары себеп болды. Ресей Федералдық кеден қызметінің мәліметінше, Қытайдан келген екі жүк көлігінен бақылау камералары, жылу түсіргіштер және жүк тастауға арналған құрылғылармен жабдықталған дрондар табылған. Аталған жүк Приморье өлкесіндегі кедендік өткізу бекетінде тексерілген. Қораптарда жасырылған дрондар халық тұтынатын тауарлар ретінде ресімделіп, ресейлік компанияның атына жолданған. Ресей тарапының мұндай қатаң шараларға баруына тағы бір себеп – қыркүйек айының басында басталған «көлеңкелі» импортпен күрес. Осы шаралар аясында жүк көліктері мен құжаттарға қойылатын талаптар айтарлықтай күшейтілді. Бұл жағдай Қазақстан тарапынан наразылық тудырды. Қазақстан бұл мәселені Еуразиялық экономикалық комиссия деңгейінде көтеріп, оны сыртқы саудаға кедергі ретінде тануды сұрады.
