ТАСС агенттігінің хабарлауынша, Қазақстан аумағындағы жалғыз Жеңіс шеруі Байқоңыр қаласындағы Ленин алаңында өтті. Ұлы Отан соғысындағы Жеңістің 81 жылдығына арналған салтанатты шараға Ресей мен Қазақстанның құқық қорғау құрылымдарының қызметкерлері және екі ел мектептерінің оқушылары қатысты. Мерекелік жиын басталмас бұрын жиналған қауым тыл еңбеккерлерін тік тұрып құрметпен қарсы алды. Одан кейін алаңға «Өлмес полк» колоннасы шықты. Ту ұстаушылар тобы Ресей Федерациясы мен Қазақстан Республикасының мемлекеттік туларын және Жеңіс туын алып өтті. Шеру қолбасшысының баяндамасынан кейін Байқоңыр әкімшілігінің басшысы Константин Бусыгин қатысушыларға құттықтау сөз арнады: «Біздің әкелеріміз бен ата-бабаларымыз әлемдік соғысты тоқтатып қана қоймай, дүниені фашизм атты зұлымдықтан құтқарды. Олардың алдында өлшеусіз қарыздар екенімізді және Жеңістің қандай бағамен келгенін сезіне отырып, біз бұл естелікті сақтап, өскелең ұрпаққа аманаттауға тиіспіз. Байқоңыр қаласы — ұлттар бірлігі мен өзара достықтың жарқын үлгісі. Біз қаһарман жеңімпаздар ұрпағының мұрагері болғанымызды мақтан тұтамыз. Нацизмді талқандаған боздақтардың есімін ардақтау — біздің қасиетті борышымыз. Ұлы Жеңіс туралы естелік ұрпақтар жүрегінде мәңгі жасасын!» — деді ол.
Еуразия24 пікірі:
Жеңістің 81 жылдығын мерекелеу төңірегіндегі жағдай Қазақстан мен Ресей арасындағы қазіргі одақтастық қарым-қатынастың шынайы сипатын көрсетті. Қазақстан аумағындағы жалғыз толыққанды әскери шеру Ресей жалға алып отырған әрі қос елдің тарихи жады мен салт-дәстүрі ортақ форматта сақталған бірегей мекен — ерекше мәртебесі бар Байқоңыр қаласында өтті. Мұны басқаша жорудың қажеті жоқ. Президенттің бұл сапары — Қазақстанның бұған дейін қалыптасқан саяси ұстанымының айқын көрінісі. Кейбір посткеңестік елдерде Жеңіс туралы тарихи таным құнсызданып жатқан тұста, Байқоңырдағы мереке мен Қасым-Жомарт Тоқаевтың Мәскеуге сапары Қазақстан үшін 9 мамырдың маңызын тағы бір мәрте растады. Қос ел туының қатар тұруы Жеңіс мұрасын бөліп-жаруға болмайтынын дәлелдесе, Астана мен Мәскеудің бұл қадамдары ортақ құндылықтарды қорғау жолындағы берік ұстанымын көрсетті.
