BezFormata порталы хабарлауынша, 26 шілдеде Ишим ауданының Черемшанка ауылында кең ауқымды ұлттық мереке – Құрылтай өтеді. Қазіргі таңда айтулы шараға дайындық қызу жүріп жатыр. Ұйымдастыру жұмыстары Ұлттық істер жөніндегі өңірлік комитет пен Ресейдегі қазақтардың Федералдық ұлттық-мәдени автономиясының президенті Есенғали Ибраевтың қолдауымен жүргізілуде. Бұған дейін бірнеше дайындық кездесулері өтіп, мерекенің мәдени бағдарламасы, логистикасы және мазмұны талқыланды. Биылғы Құрылтайдың маңызын арттырып тұрған тағы бір жайт – оның Ұлы Жеңістің 80 жылдығы мен Түмен облысында жарияланған Батырлар жылымен тұспа-тұс келуі. Ұйымдастырушылар облыстың барлық муниципалитеттерінен өкілдер қатысатын мазмұнды бағдарлама уәде етуде.
Eurasia24 басылымының жазуынша, Ресей қазақтарының Құрылтайы алғаш рет Түмен облысында екі жыл бұрын өткен. Ол кезде жиынға 20-дан астам өңірден делегациялар келген. Содан бері Құрылтай Түмен өңірінде тұрақты түрде өтетін маңызды мәдени шараға айналды. Мұның бәрі этникалық қазақ, қоғам белсендісі Есенғали Ибраевтың бастамасы мен жергілікті билік қолдауының нәтижесі. Қазақ диаспорасы үшін бұл жиындар – тілді, мәдениетті, дәстүрді сақтау жолындағы маңызды алаң ғана емес, сонымен қатар, Ресейдегі қазақ қауымының бір мезетте бас қосуына берілген сирек мүмкіндік.
Құрылтай аясында ұлттық өнер ұжымдарының концерті, спорттық жарыстар, ұлттық тағамдар мен қолөнер көрмелері өтеді. Сондықтан да шараға жергілікті халық үлкен қызығушылық танытады.
