АСТАНА. 15 қазан. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күні өткен жалпы отырыста «Қазақстан Республикасының Үкіметі мен Ресей Федерациясының Үкіметі арасындағы Челябинск мемлекеттік университетінің Қостанай қаласындағы филиалының қызметі туралы келісімді ратификациялау туралы» заңды қабылдады.
Мәжілістің әлеуметтік-мәдени даму комитетінің қорытындысында көрсетілгендей, бұл келісімді ратификациялау Қостанайдағы Челябинск мемлекеттік университеті филиалының қызметін құқықтық тұрғыдан реттеуге және оның жұмыс істеу шарттарын айқындауға мүмкіндік береді. Бұл қадам екі ел арасындағы жоғары білім беру саласындағы ұзақ мерзімді әріптестікті дамытуға және халықаралық ынтымақтастықты тереңдетуге бағытталған.
Келісімде филиалдағы оқу үдерісіне, білім беру мазмұнына, оқыту тілі мен нысандарына, мемлекеттік қорытынды аттестацияны өткізу тәртібі мен білім туралы құжаттарды беру мәселелеріне қойылатын талаптар бекітіледі. Сондай-ақ лицензиялау, бақылау жүргізу және білім беру қызметінің аккредитациясынан өту тәртіптері қарастырылған.
Аталған заң жобасы Сенаттың қарауына жіберілді.
