Factcheck.kz басылымының хабарлауынша, «Қазақстан ата-аналар одағы» қоғамдық бірлестігі аталған заң жобасының қазіргі нұсқасына түбегейлі қарсы шығып, арнайы петиция бастады. Бірлестік өкілдері құжатта мектеп психологтарына ата-ананың рұқсатынсыз балалардың психикасына араласып, түрлі психологиялық манипуляциялар жасауға заңды түрде жол берілген деп есептейді. Алайда редакциямен тілдескен сарапшы заң жобасының шикі тұстары болғанымен, ата-аналар одағының бұл мәлімдемесі қоғамды адастыратынын және психолог мамандарға деген теріс көзқарасты (стигманы) өршітетінін алға тартады. Мәселен, отбасылық психолог әрі «Just Support» қорының жетекшісі Светлана Богатырева бала өміріне жасалатын кез келген елеулі психологиялық интервенция тек ата-ананың хабардар болуымен және келісімімен ғана жүзеге асырылуы тиіс деп санайды, сондықтан ол заң жобасындағы 13-баптың қазіргі тұжырымдамасын қолдамайды. Сонымен бірге, маман баланың өмірін арашалап қалу қажет болған кризистік жағдайларда, егер ата-анасы әрекетсіз отырса немесе көмек көрсетуге тікелей кедергі келтірсе, психологиялық араласудың жедел жасалуын толық құптайды.
Еуразия24 пікірі:
«Қазақстан ата-аналар одағы» тағы да белсенділік таныта бастады. Бұл қоғамдық бірлестіктің белсенділері жұртты таңғалдырудан жалыққан емес. Кезінде ең даулы әрі резонансты мәлімдемелер дәл осы ұйымның ішінен шыққан болатын. Мәселен, олар тұрмыстық зорлық-зомбылық туралы заңның қабылдануына ашық қарсы шықты. «Ата-аналар» 2024 жылы қабылданған заң нормалары отбасынан «балаларды заңсыз тартып алуға» бағытталған деп байбалам салған болатын. Содан бері екі жыл өтсе де, осы белсенді әйелдер сырттай «араша түскен» отбасылардың қаншасы ата-ана құқығынан айырылды екен? Сондай-ақ, бұл одақтың Қуандық Бишімбаевтың анасы Әлмира Нұрлыбековаға «өз перзентін қорғап қалған қайсар да адал ананың үлгісі» ретінде «Жыл анасы» сыйлығын тапсыруы қоғамда бұдан да үлкен талқылау тудырған еді. Ел ішіндегі балаларды міндетті вакцинациялауға қарсы бағытталған екпеге қарсы науқандар да дәл осы «Ата-аналар одағының» бастамасы болатын. Міне, енді олар психологиялық көмек көрсету ісіне де шүйлігіп отыр. Таңғаларлығы, құқық қорғау органдарының тапсырмасымен еліміздегі мектептер, колледждер мен жоғары оқу орындарының ағынды суларында есірткі іздерінің бар-жоғын тексеру басталғаны туралы Әділет министрлігі Сот сараптамасы орталығының директоры Бақытжан Бәйтелесовтің мәлімдемесіне бұл белсенділер неге үнсіз қалды? Бұл да полицияның назарына іліге бастаған есірткі тұтынушы балалардың құқығына тікелей қатысты мәселе емес пе еді?
