KazTAG агенттігінің хабарлауынша, Қазақстан Үкіметі шекара маңындағы өңірлерде бірқатар мектептердің жабылу қаупін растады. Бұл туралы Мәжіліс депутаттарының сауалына жауап берген вице-премьер Ермек Қошербаев мәлімдеді.
Оның айтуынша, қолданыстағы заңнамаға сәйкес, мектептердің жұмыс істеуі оқушылар санына тікелей байланысты:
– 5 және одан көп бастауыш сынып оқушысы бар ауылда – бастауыш мектеп;
– 41 және одан көп оқушысы бар ауылда – негізгі мектеп;
– 81 және одан көп оқушысы бар елді мекенде – жалпы білім беретін мектеп сақталады.
«Бірақ қазіргі уақытта бірқатар ауылдарда оқушылар саны белгіленген шектен айтарлықтай төмен болғандықтан, 2025–2026 оқу жылында кейбір мектептер негізгіге, негізгі мектептер бастауышқа айналуы, тіпті кейбірі жабылуы мүмкін,» – деді Қошербаев.
Осыған байланысты Оқу-ағарту министрлігі Батыс Қазақстан облысы әкімдігіне арнайы хат жолдап, шекаралық аймақтардағы ауыл мектептерін сақтап, дамыту қажеттігін ескертті.
Eurasia24 пікір білдіреді:
Қазақстанда 1991 жылдан бері 1400-ге жуық мектеп жабылған. Олардың басым бөлігі «малокомплектные», яғни шағын жинақты ауыл мектептері. Қазір Батыс Қазақстан облысында оннан астам мектеп жабылудың алдында тұр. Бұл туралы Мәжіліс депутаты Нартай Сарсенғалиев вице-премьерге жолдаған депутаттық сауалында мәлімдеген.
Ол Президент Тоқаевтың мына сөзін алға тартады:
«Ауыл – мектеп тұрғанда ғана өмір сүреді».
Шынында да, депутаттың уәжі орынды – ауыл баласы ауылда оқуға құқылы, олар ауылдан үдере көшуді таңдамайды, тек мектеп қалмаса ғана амалсыз кетеді. Бірақ екінші жағынан – бір мұғалім барлық пәнді оқытатын мектепте қандай білім сапасы болады? Мұғалім тапшы, ресурстар жоқ, ал талап – бірдей.
Мәселе тек мектепте емес. Бұл – ауылдардың біртіндеп жойылып бара жатқанының симптомы. Мемлекет бірнеше жыл қатарынан «Ауыл – ел бесігі», «Ауылды дамыту» сынды бағдарламаларға миллиардтар бөлді. Бірақ нақты нәтиже қайда?
Ақша игерілді – ал ауыл сол баяғы күйінде. Мектептер жабылып жатыр, халық көшіп жатыр, өмір тоқтап жатыр. Бұдан артық қандай себеп керек ауылға барып, жергілікті шындыққа көз жеткізу үшін?
