ҚР Қаржылық мониторинг агенттігі хабарлайды: Блокчейн арқылы жүргізілген криптотранзакциялар мониторингі барысында интернет-алаяқтық пен есірткі саудасынан түскен кірістерді заңдастыруға кәсіби қызмет көрсеткен «RAKS exchange» атты криптовалюта айырбастау сервисі анықталды. Агенттіктің мәліметінше, бұл сервис қылмыстық ортада жоғары беделге ие болған және 5 миллионнан астам қолданушысы бар 20 ірі Darknet маркетімен ынтымақтастық орнатқан. Соңғы үш жыл ішінде аталған криптосервис арқылы Қазақстан, Ресей, Украина және Молдова елдерінің 200-ден астам есірткі дүкендерінің заңсыз табыстары заңдастырылған. Қызметтің жалпы айналымы 224 млн АҚШ долларынан асқан. Криптозерттеу аясында 4 000-нан астам криптовалюта әмияны талданды. Қылмыстық кірістер сақталған жинақтаушы әмияндар анықталып, 67 криптокошелек бұғатталды. Нәтижесінде 9,7 млн USDT көлеміндегі (яғни, 5,2 млрд теңге) цифрлық активтер тоқтатылды. Қазіргі таңда «RAKS exchange» қызметі толық тоқтатылған: әлеуметтік желілердегі аккаунттары жойылды, клиенттерге қызмет көрсету жұмысы тоқтатылды. Darknet платформаларында наркошоптар тарапынан қаржылық міндеттемелердің орындалмауына байланысты көптеген шағым тіркелуде. Қазіргі уақытта криптосервис ұйымдастырушыларын анықтау және әшкерелеу бағытында белсенді жұмыс жүргізілуде.
Евразия24 пікірі:
ҚР Қаржылық мониторинг агенттігі (ҚМА) қылмыстық жолмен алынған кірістерді заңдастыруға қарсы іс-қимыл шеңберінде нәтижелі жұмыстар жүргізіп жатыр. Бұл – күштік құрылымдардың тиімді әрі нәтижелі жұмысымен мақтануға болатын жағдай. Мәселен, жақында Алматы қаласы бойынша ҚМА департаменті «Amir Capital» қаржы пирамидасының қызметіне қатысты қылмыстық істі тергеп жатыр. Іс аясында жалпы сомасы 10 миллион АҚШ долларынан асатын криптоактивтер мен Алматы облысындағы жер телімі тәркіленді. Күдіктілердің бірі екі айға қамауға алынды. Агенттік бұған дейін комиссиялық дүкендер ретінде тіркелген ломбардтар желісі арқылы жүзеге асырылған заңсыз микрокредиттеу фактілерін анықтаған болатын. Сонымен қатар, Бірыңғай жинақтаушы зейнетақы қорынан (БЖЗҚ) қаражатты шығару арқылы жалған стоматологиялық қызмет көрсету схемасы анықталды. Бұл іске тартылған қаражат көлемі – 200 млрд теңгеден асты. Соңғы жаңалық – заңсыз криптовалюта айырбастау сервисі «RAKS exchange»-тің әрекетіне тосқауыл қою. Агенттік бұл қылмыстық схеманы толығымен жойып, цифрлық активтерді бұғаттап, платформаның қызметін тоқтатты.
