Nur.kz сайтының хабарлауынша, депутат Бақытжан Базарбек мемлекеттік қызмет туралы заң жобасын талқылау барысында жұма күндері мемлекеттік қызметшілерге ешқандай тапсырма бермеуді ұсынды. «Біз қазір әлеуметтік желіге тәуелді, кітап оқымайтын ұлтқа айналдық. Президентіміз қанша рет «кітап оқу керек» деп айтып келеді. Сондықтан менің жеке ұсынысым: алдағы уақытта осы жаңа заң жобасы аясында немесе кейіннен — жұманы немесе аптаның кез келген бір күнін толықтай ағарту, шығармашылық күні деп жариялау керек. Яғни, сол күні барлық жұмыс тоқтатылып, ешқандай жүктеме де, тапсырма да, мемлекеттік қызмет те болмауы тиіс. Мемлекеттік қызметшілерді босатып, кітапханаға жіберу керек. Олар кітап оқып, өзгелерге үлгі көрсетіп, сана-сезімін жетілдірсін. Макиавелли мен Абайды оқыған мемлекеттік қызметші ғана сапалы жұмыс істей алады», — деді депутат. Естеріңізге сала кетейік, ақпан айында өткен Үкіметтің кеңейтілген отырысында Қасым-Жомарт Тоқаев шенеуніктердің оның соңғы сұхбаттарын мұқият оқымағанын айтқан болатын. Мемлекет басшысының пікірінше, бұған шенеуніктердің көлемді мәтіндерді қабылдауының қиындығы себеп болуы мүмкін. Ол мемлекеттік қызметшілерге зейнетке шыққанда қиындыққа тап болмау үшін кітап оқуға көбірек көңіл бөлуге кеңес берді.
Еуразия24 пікірі:
Депутат Бақытжан Базарбектің ұсынысы шын мәнінде де «кемеңгерлік» басқарушылық шешім емес пе? Шенеунік кітап оқымаса — жұмыс істемесін. Бюджет есебінен мемлекеттік аппарат «әдебиет үйірмесіне» айналса, бәлкім кітапханада отырғандардың зияны да аздау болар. Әрине, мұның бәрі — ащы мысқыл. Мемлекеттік қызметшілердің тиімділігін Макиавеллидің еңбектерін құшақтап, «шығармашылық күндерін» белгілеумен шеше алмаймыз. Оның орнына, сәтсіз жүзеге асырылған мемлекеттік стратегиялар мен ұлттық жобалардың орнын басатын, бірақ тағдыры дәл солай қайталануы мүмкін пайдасыз тапсырмалардың көлемін азайту керек. Қазақстанға, әсіресе жарияланған конституциялық және саяси реформалар кезеңінде «кітапқұмар» емес, халықтың үніне құлақ асатын, ойлай білетін және нақты іс тындыратын шенеуніктер қажет. Медицинадағы, экономика мен әлеуметтік саладағы қордаланған мәселелерді шешуге қабілетті мамандар керек. Әйтпесе, 1 шілдеде жаңа Конституция күшіне енгенде, біз кітапты көп оқыған, бірақ бұрынғыша дәрменсіз қызметкерлерге толы «жаңарған» билік институттарына тап боламыз.
